Bruk av munnbind inne i ny smitterettleiar for vidaregåande

Etter ein innspelsrunde frå organisasjonane har fagmyndigheitene laga ein eigen smitterettleiar for vidaregåande. Her opnar dei for bruk av munnbind utanfor undervisinga.

Fram til no har det vore ein felles smittevernrettleiar for ungdomsskule og vidaregåande. Og sjølv om desse skulane har mykje til felles, er det ein del ulikheiter som ikkje har kome godt nok fram i dagens rettleiar. Etter innspel frå organisasjonane, får den vidaregåande skulen no ein eigen rettleiar.

– I den nye rettleiaren er dagens råd og anbefalingar tydelegare, slik at den blir lettare å følgja. Skuleeigarane kan i samråd med lokale helsemyndigheiter vurdera bruka av munnbind utanfor undervisinga som eit ekstra smitteverntiltak for elevar og tilsette, står det i ei pressemelding frå regjeringa.

 

Grunnleggjande råd framleis viktigast

Å halda seg heime om ein er sjuk, halda avstand til kvarandre, god hand- og hostehygiene og kontaktreduserande tiltak står framleis sentralt i den nye rettleiaren. Den held også fast på trafikklyssystemet som ein har blitt kjend med fram til no.

– Smittevernrettleiaren med trafikklyssystem har vore føreseieleg og hatt ein forståeleg struktur, men vi har fått tilbakemeldingar på at det er stor variasjon i korleis det vert etterlevd. Ei tydeleggjering av rettleiaren har difor vore ein prioritering. Den nye rettleiaren skal gjera det enklare for skulane å følgja smitteverntiltaka, seier kunnskaps- og integreringsminister Guri Melby i pressemeldinga.

 

Frivillig munnbind

Det er FHI, Helsedirektoratet og Utdanningsdirektoratet som har hatt i oppgåva å revidera alle smittevernrettleiarane for barnehage, skule og vaksenopplæring. Rettleiaren for vidaregåande var klar onsdag, medan dei andre vil koma i løpet av torsdagen.

– Smittevern i vidaregåande er ei utfordring, fordi elevane er eldre og ein samlar elevar frå eit større geografisk område. Dei eldste elevane har betre føresetnadar for å bruka munnbind rett, og difor kan munnbind utanfor klasserommet vurderast som eit ekstra smitteverntiltak. For eksempel kan det vera aktuelt i fellesområdet der det lett kan oppstå trengsel, seier Melby.

Om munnbind blir anbefalt, skal det framleis vera frivillig for elevar og tilsette å bruka det. Munnbind bør delast ut gratis til elevane. Det skal heller ikkje vera ei erstatning for å halda avstand.

– Anbefalinga om avstand er nyleg oppjustert til to meter. Dette gjeld ikkje i barnehagar og skular, fordi det må vera praktisk mogleg å halda barnehagar og skular opne. Når det ikkje er mogleg å halda avstand, vert det desto viktigare å redusera talet nærkontaktar, står det å lesa i pressemeldinga.

 

Endringar og oppdateringar i ny smittevernrettleiar som vil gjelda frå 12. april:

* Kunnskapen om smitte og barn og unge si rolle er oppdatert til dagens situasjon med muterte virus.

* Skuleeigar kan i samråd med lokale helsemyndigheiter anbefala bruk av munnbind utanfor undervisinga, for eksempel i friminutta og på veg til klasseromma.

* På raudt nivå bør talet kontaktar elevane har i løpet av ei veke halverast i forhold til gult nivå. Det betyr at klassane mange stadar må delast i mindre grupper, eksempelvis halve klassar.

* Tydelegare råd om nærkontaktar slik at det vert enklare å definera kven som må i karantene. Med nærkontaktar meiner vi personar som har vore i mindre enn to meters avstand frå personen som er smitta i meir enn 15 minutt.

* Smitteverntiltak tilpassa med særskilde behov både i ordinær vidaregåande skule og spesialskule har fått eige omtale.

* Vaksenopplæringa har fått eigen omtale.

* Brukarperspektivet er betre ivareteke. Det er tydeleggjort anbefalingar om at elevråd og skulehelsetenesta skal delta aktivt i planlegginga av smitteverntiltak på skulen.

* Skuleeigars ansvar for smittevern er tydeleggjort.