- Brrrrrr

Ein måtte kle seg godt om ein ville utandørs i store deler av februar. Men om ein tok seg bryet, fekk ein jaggu godt betalt for innsatsen.

I fjor skreiv Grenda «ikkje mykje til vinter» om februarvêret. I år har kvinnheringane derimot fått tilbake med renter, for sjeldan har vi hatt så mykje vinter som i førre månad. Snøen som var komen vart liggjande, i alle fall i fyrste halvdel. Underlagsmaterialet frå dei ulike målestasjonane i Kvinnherad, viser tydeleg at det både var solrikt, nedbørsfritt og kaldt meir eller mindre heile tida frå månaden starta og fram til kring 19. februar.

– Han var ganske todelt, denne månaden, stadfestar Henrik Barthel i Ølve.

Statistikken viser at seks av 11 stasjonar noterte mindre enn 100 millimeter nedbør. Minst regn og snø kom det i Austrepollen. Der stoppa målebegeret på 43,3 mm. Mesteparten av nedbøren kom i løpet av tre døger frå 25. til 27. februar. På andreplass kom Rosendal-Vang, medan Sæbøvik sikra bronsen.

 

Ufatteleg endring

Mest nedbør fekk sjølvsagt Matre. Men 211,1 mm finn nok kraftprodusentane i bygda akseptabelt.

Ser vi på nærare på skilnaden frå fjoråret, er konklusjonen at det var svært mykje tørrare i år. Det same gjeld for dei to fyrste månadane samla. Vi snakkar eigentleg om eventyrlege forskjellar. I Matre, for eksempel, har det altså kome 888,2 millimeter mindre i januar og februar enn på same tida i fjor. Det er ei nærast ufatteleg endring. Årsaka er enkelt og greitt at vi har hatt to svært spesielle år; i fjor regna det enormt mykje, i år har det vore særdeles fint.

Historisk sett er februar 1986 framleis i ein særklasse. Då noterte Søral berre 6,2 millimeter nedbør. I motsett ende dominerer 1998-utgåva med 464,7 mm.

 

Aldri over null

Også temperaturane var uvanlege i februar. Talmaterialet viser at korkje Mauranger, Rosendal eller Valen, og sikkert ikkje så mange andre stader heller, hadde plussgrader ein einaste dag frå 1. til og med 13. februar! Fyrst den 14. krabba termometeret over null. Frå 17. og ut månaden var det motsett, då var det aldri minusgrader. Dermed enda snittet så vidt på pluss-sida.

– Det byrja å bli slitsamt kaldt. Det var jo fint, men litt i kaldaste laget, synest eg, seier Henrik Barthel.

Varmast var det i Rosendal den 21. februar, då kunne ein meska seg med 14,8 varmegrader. Flest minusgrader måtte Omvikdalen finna seg i. Der vart det registrert -10,4 den 5. Men Henrik Barthel røper at han uoffisielt noterte 16-17 kuldegrader i Stussvikjo.

Ein kan til slutt merka seg at etter mange månader med relativt lite vind, ruska det godt den 23. februar, spesielt i Rosendal. På Vang var det einskildkast som passerte orkangrensa.