Brødrene Musland byggjer stort på Børneset

Brødrene Musland Maskin AS byggjer i desse dagar eit flett nytt bygg som vil firedobla lagringsplassen deira på Børneset.

For halvannan månad sidan starta Brødrene Musland Maskin AS på arbeidet med å reisa si nye storstove på industriområdet sitt på Børneset i Uskedalen. No er det 640 kvadratmeter store bygget tett og snart klart for innflytting.

– På to firedagarsveker med arbeid så kom elementbygget på plass. Det viser godt igjen, og har gått kjappare enn ein skulle tru. Taket er kome på plass, neste steg er å få inn portar og dører, så håper vi at alt skal vera ferdig før fellesferien startar, seier dagleg leiar Roar Musland.

 

Kostbar investering

Då kan anleggsmaskinførarane flytta alt av utstyr og maskinar frå den 160 kvadratmeter store rubbhallen dei i dag disponerer og inn i den nye storstova.

– Det er ei kostbar investering for oss, men på sikt så trur eg det vil ha ein god misjon. Vi vil få langt betre oversikt over alt utstyret vi har og i tillegg vil vi kunna ta vare på maskinane våre på ein betre måte. Når ting står ute heile året så forringar det seg veldig i verdi, så eg trur det kjem til å bli ei god investering, seier Roar.

Men sjølv om dei no får tipp topp lagringsplass for sine mange maskinar, håper Roar at han ser så få maskinar som mogleg inne i lagerbygget.

– Vi håper jo at dei fleste skal vera i drift til kvar ei tid, smiler han.

Og sjølv om Musland-brørne har merka at koronapandemien har sett sine sport i marknaden, er ordrebøkene fulle fram til seinhausten. Som igjen betyr at håpet om å ha flest moglege maskinar i drift lever i beste velgåande.

– Det er fullt opp utover hausten. Blant våre store prosjekt så er vi for tida på plass i Valevågen kor vi har ein avløpsjobb og så skal vi opp til Valldalen i Røldal å gjera ein større jobb, seier Roar.

 

Unngått korona

For dei aller fleste har 2020 vore eit veldig spesielt år, men Brødrene Musland Maskin har unngått sjukdom og karantene på sine seks tilsette.

– Vi har vore heldige sånn sett, og har unngått karantene og full stopp i drifta. Så er vi spente på vegen vidare og om det kjem nokon seinverknadar som kan påverka oss. Noko vi sjølvsagt håpar å unngå, seier han.

Han er nøgd med området deira på Børneset og ser fram til å ha den nye storstova klar til ferien. Men sjølv om han meiner dei ligg sentralt plassert i kommunen på eit flott område, er det ein ting han saknar.

– Børneset er midt i blinken for vår del, og vi er veldig godt nøgd med at vi har etablert oss her. Men det hadde vore kjekt med nokon fleire naboar her på området, seier han.