– Brennheit arbeidsmarknad
Ved utgangen av oktober kunne NAV melda om eit luksusproblem. Vestlandet treng nemleg meir arbeidskraft, samstundes som arbeidsløysa nærmar seg det låge rekordnivået frå 2019.
Publisert
Sist oppdatert
«Arbeidsløysa i Vestland fylke er no nede i 2,1 prosent. Dette er lågare enn før pandemien, og fleire bransjar jaktar på nye medarbeidarar.» skreiv NAV Vestland i ei pressemelding 29. oktober. I denne kjem det fram at det då var 7266 personar i fylket som var registrert som heilt arbeidsledig, altså 2,1 prosent av arbeidsstyrken.
Assisterande direktør i NAV Vestland, Bjarte Hysing-Olsen, skildrar arbeidsmarknaden som brennheit, og grunngjev noko av situasjonen med at utanlandske fagfolk ikkje har kome attende etter pandemien.
Annonse
– Arbeidsgjevarar fortel oss at dei manglar folk for å få verksemda til å gå rundt. Det gjeld også yrke som ikkje krev mykje formell utdanning. Dette er ein gyllen sjanse til å tenkje nytt og inkludere fleire i arbeidslivet. NAV kan støtte bedriftene med rekruttering og oppfølging, seier han til NAV.
Han avsluttar med ei oppmoding om at både arbeidsgjevarar og -søkjarar utnyttar situasjonen:
– Vi har mange døme på kandidatar som gjer ein god jobb sjølv om den formelle kompetansen ikkje var på plass då dei starta.
I Kvinnherad var 96 personar er registrert som heilt arbeidsledige ved utgangen av oktober, noko som utgjer ein prosentvis andel på 1,4 .
