– All aktivitet er betre enn ingen

Lokallaget LHL Kvinnherad, som er blant dei største i Hordaland, har varierte aktivitetar som totalt har eit imponerande tal av deltakarar i løpet av veka.

Styreleiar Synnøve Grude fortel at dei har eit variert tilbod i løpet av veka. Her er det mogleg å trimma seg sveitte, og gå turar i sosialt lag. Torsdag fekk Grenda vera med på ein rusletur saman med nokre av medlemmane i lokallaget. Turen byrja ved biblioteket på Husnes Kulturhus.

– Det er mange som deltar på aktivitetane me tilbyr. Her er det folk i alle aldrar, og alle typar fysisk form. Dei fleste har hatt helseproblem, men me har også deltakarar som er med for å førebygge. Her kan me utveksle erfaring om å ha sjukdom og å leva med sjukdom, eller å vera pårørande til nokon som er sjuk. Her er alle velkomne, smiler Synnøve.

Kvar torsdag kan alle som ynskjer vera med på ein rusletur. Dette tilbodet starta laget opp med under koronapandemien, då dei såg eit behov for å koma seg ut i frisk luft og møta andre.

– Det var ei tung tid for mange, og nokon sat heime åleine. Me starta difor med eit lavterskel-tilbod, som me kalla rusletur. Då går me ein kort distanse, har me oss kaffi og set oss ned på ein hyggeleg stad saman. All aktivitet er jo betre enn ingen. Og dette tilbodet er mellom anna lagt opp for eldre med rulator, og til saman er me ni stykk som plar å møtast til rusleturen, fortel Synnøve og legg til:

– All aktivitet er betre enn ingen, og denne rusleturen merkar eg er både viktig og kjærkomen for medlemmane vår.

Variert utval

På torsdagen er det også vasstrim i varmtvassbassenget på Husnes. Olav Johnsen er aktivitetsleiar i LHL Kvinnherad, både på onsdags-treninga på TrimX og i varmtvassbassenget. Totalt er det eit godt og variert utval av aktivitetar for medlemmane.

– Me har eit samarbeid med danselaget på måndagar, i tillegg eit samarbeid med tur-gruppa til Frivilligsentralen på tysdagar. Då møtes med først på kulturhuset og nyttar oss av Frivilligsentralen sin kafe. Her har me ein ørliten lunsj og kaffi, til ein rimeleg pris. Det er svært kjekt å møtes her før me legg ut på tur. Elles kan medlemmane møtast til trening på TrimX kvar onsdag føremiddag, informera Synnøve medan nestleiar Ingunn Gudding legg til:

– Første tysdagen i månaden er det også duka for arbeidsstova. Her møtes rundt 30 medlemmar og har det triveleg saman, samstundes så me lagar flotte gevinstar til basaren.

I laget er det også ei rad nemnder og utval i arbeid. Ei basar og festnemnd er mellom anna i sving med å skaffa inntekt til lagsarbeidet. I fjor utgjekk basaren, men i år er det endeleg mogleg å samlast igjen.

– Basaren gler me oss stort til, smiler Ingunn.

Årleg tur

Tur og reisekomiteen arbeidar med å førebu turar både på våren og hausten. Den årlege turen utgjekk også i fjor, men i september var medlemmane på ein dagstur til Tyssedal. No ser dei fram i mot ein ny tur til våren.

– Desse turane er fantastisk kjekke, og svært populære. Til våren skal me ha to overnattingar, og då går turen til Lindesnes og Mandal. Det gler me oss til, smiler Synnøve.

Elles skipar laget til den årlege julemiddagen, grillfestar og har medlemsmøte ein gong i månaden.

– På medlemsmøta informera styret om kva me arbeidar me, mellom anna om dei komande turane, og dei varierte tilboda me har. Nokon gongar er det foredrag og underhaldning, og så klart servering av kaffi og noko å bita i, fortel Synnøve.

I LHL Kvinnherad kan alle som vil vera medlemar, unge som eldre.

– Formålet er å halda oss i god form, men det er minst like viktig å leggja til rette for ein sosial møteplass, seier ho.

– LHL er eit kjærkome lag for medlemane. Tilboda deira er kreative og varierte, så her er det noko for kvar og ein. Det er svært kjekt og sosialt, legg Ingunn til.

Synnøve fortel at dei ønskjer fleire medlemmar, og for dei som kanskje vegrar seg, har ho nokre gode ord å dela med nettopp deg:

– Nokre er kanskje litt skeptisk til å bli medlem, og nokre vågar ikkje. Til deg vil eg fortelja at det absolutt er verdt å prøva. Her kan ein koma å bli kjent med tilboda og oss medlemmar, og me tek kvar og ein imot med varme og opna armar. Det er alltid kjekt med nye medlemmar, sluttar Synnøve.