Brannvernveka fokuserer på ladevit

Open brannstasjon blir arrangert over heile landet denne veka, som ein del av den nasjonale brannvernveka. Tidspunktet er ikkje tilfeldig, då hausten markerer inngangen til ei tid på året da talet bustadbrannar vanlegvis aukar fordi ein bruker meir straum og levande lys.

Opnar brannbilen

Meir enn 350 brannstasjonar over hele landet inviterer til Open brannstasjon i løpet av denne veka.

– I vårt distrikt opnar Halsnøy brannstasjon porten for store og små besøkande laurdag 23. september. Open brannstasjon over heile landet er blitt ein fantastisk fin tradisjon, og ein viktig arena for å gi nyttig info om brannførebygging, seier leder for førebyggande avdeling ved Kvinnherad brann og redning Øyvind Ousdal.

I år er det ladevit og generell branntryggleik i heimen det blir fokusert på.

– På Open brannstasjon får dei minste læra om branntryggleik. Det blir konkurranse, demonstrasjon av sløkkeutstyr og sjanse til å sitja i ein brannbil. Me håper mange tar turen, og er klare for storinnrykk på brannstasjonen, seier Ousdal.

– Øv heime

Skuler og barnehagar har krav på seg om å gjennomføra jamlege brannøvingar. Det kravet har ein ikkje i heimane, trass i at dei fleste farlege brannar oppstår der.

– Me oppmodar alle til å bruke Brannverveka til å prata om og øva på kva ein skal gjera om det byrjar å brenna i bustaden. Det behøver ikkje vera meir komplisert enn at de avtalar ein møteplass og kven som skal gjera kva. All erfaring viser at dei som har øvd, og med det er forberedt på dramatiske hendingar, også handterer dei best, avsluttar Ousdal.