Brann i lastebil - 120 liter hydraulikkolje rann ut

Ifølgje meldinga frå Vest politidistrikt skal det ha vore snakk om opne flammar frå lastebilen. Allereie klokka 09.46 skreiv politiet at flammene har gitt seg, og at brannmannskapet er i gang med innsats på staden.

«Det skal berre ha vore førar i lastebilen. Det er ikkje meldt om verken personskadar eller at vedkomande har vore eksponert for røyk», stod det.

Det skal ikkje ha vore farleg gods i lastebilen.

Det blei først varsla om ein mindre lekkasje av hydraulikkolje, men klokka 10.14 meldte politiet at det dreia seg om kring 120 liter hydraulikkolje som hadde runne ut i vegbanen.

Stengt veg

Vegen i området var tidvis stengt fredag.

«Lastebilen er lasta med stein. Bergingsbil er rekvirert», opplyste politiet.

«Tungbilbergar er på staden. Ingen synlege skadar på lastebilen bortsett frå noko sotskade. Truleg varmgang som har tent på hydraulikkolja som er årsaka», skreiv dei.