BraLunsj landa storkontrakt med Hydro Husnes

– Dette var veldig kjekt. Det er deileg at me endeleg har ein fast kontrakt i denne kommunen også, det er jo her som er vårt hovudkontor og kjøken, seier eigar av BraLunsj Tommy Persson.

Travelt

Persson innrømmer at det var ei stor lette då eposten om at dei vann anbodet kom.

– Det var faktisk veldig digg. Eg hadde eigentleg visst i lenger tid at det mest sannsynleg kom til å bli lagt ut på anbod, så heile venteprosessen var lang. Då har ein bygd det opp i hovudet lenge, så det var ei lette å få beskjeden, poengterte han.

Den svenske kvinnheringen er ein mann med mange jern i elden med både kafé og catering i Kvinnherad, i tillegg til kantinedrift på både Stord og Bømlo.

– Det blir jo travelt, men me finne eit system og eit opplegg som fungerer. I tillegg til nok folk på jobb og ei god skiftordning, så skal det gå fint, understrekar Persson.

– I og med at kantina er ope 7 dagar i veka, så ser me for oss at me kjem til å trenga kring 3-4 personar som må koma inni teamet vårt. I tillegg vert det også berre dagtid og helg, til kvelds- og nattevaktene skal me laga til rette for at dei kan finna seg mat i kantina. Då vert altså ikkje kantina bemanna, forklarer han vidare.

– Blir det vanskeleg å få tak i nok folk trur du?

– No har me allereie fått inn ein del søknadar, men ja, kokkar kan vera vanskeleg å få tak i. Det var vanskeleg å få tak i kokkar før korona, og endå vanskelegare etterpå. Under korona var det mange som mista jobben eller vart permitterte, som då fekk seg andre jobbar med betre arbeidstider og betre betalt. Dei er det nok vanskeleg å få tilbake til yrket no, småler Persson.

Nytt og betre

Den blide svensken er derimot sikker på at det kjem til å gå fint.

– Dette er spanande, og me må berre sjå positivt på det. Ofte er det litt tilfeldigheiter også som gjer at du finn rette personen. Det viktigaste no er å få tak i dei med pasjon for faget, for det er heller ikkje sikkert at personen med fagbrev er den rette personen for jobben, konkluderer han.

Offisiell opning av kantina vert 2. april. Før det er det mykje som skal gjerast og ordnast.

– No er planen at kjøkenet skal vera ferdig innan midten av mars, etterpå vert det nedvask, og me skal etter planen få tilgang til kjøkenet innan påske. Då skal me byggja opp kjøkenet, finna ut korleis ting skal sjå ut, i tillegg til å få varer og slikt på plass. Me vil ha mest mogeleg på plass i god tid før opninga for å unngå stress, fortel Persson.

– Hydro Husnes har gjort ein kjempejobb med både nytt kjøken og betre fellesareal. Sjølv om ikkje alle tilsette nyttar seg av kantina, så er vårt mål å auka den delen av tilsette som kjem fordi dei likar maten. Dette er jo ein stor kontrakt og me jobbar heile tida for vekst i bedrifta, og når me no får tillita til å drifta ei slik kantine så betyr det mykje for oss som føretak. Me gler oss til eit godt samarbeid med Hydro, avsluttar Persson.

Det var Kvinnheringen som først omtalte kontrakten.