Bra Lunsj skapar ekstra hotellkjensle

Bralunsj ved Tommy Persson har inngått ein avtale med Husnes sentrum hotell om levering av frukost sju dagar i veka. No ser han fram imot eit langvarig samarbeid.

– Fyrste dagen med frukostbuffet har gått over all forventning. Eg trur det har vore rundt 50 personar til bords i dag. Det er fleire som har kome med gode tilbakemeldingar, så ein ser at gjestene har ynskt eit slikt tilbod, fortel den svenske kokken som bur på Halsnøy.

Gjestene har tidlegare fått frukost levert i ein pose på døra. No ynskjer Persson å gi dei ei skikkeleg hotellkjensle.

– Frukosten er slik eg sjølv ynskjer å få som hotellgjest. Egg og bacon, brød og rundstykke, kaffi og juice, yoghurt og cornflakes, ja, slik det bør vera. Målet er å bringa fram ekstra hotellkjensle, fastslår Persson medan han ryddar vekk dagens buffet.

Ny tilsett

I tillegg til det nye samarbeidet med hotellet på Husnes, leverer Bra Lunsj mat til eit næringsbygg på Stord sju dagar i veka. Her har Persson ein tilsett, og håper sjølv å vera til stades på Vikjo ein dag i veka. Ellers driv han med catering rundt om i Kvinnherad, der han mellom anna reiser rundt og grillar i hagen til kundar som ynskjer det.

– Eg må innrømma at det er travelt. Eg har heldigvis fått ein tilsett som skal arbeida i helger og nokre dagar i veka, men eg treng fleire erfarne hjelparar. Måndagar og tysdagar er forholdsvis rolege dagar når det gjeld catering, men når helga nærmar seg blir det sjukt travelt. Då hadde det vore fint med fleire tilsette. Alt i alt er det eit luksusproblem eg står ovanfor, smiler Persson.

Lokal handel

Frukostsalongen er både romsleg, lys og koseleg, og alt inventar er handla lokalt.

– Hotellet mista den tidlegare frukostavtalen, difor måtte all planlegging skje på kort tid. Det er sjølvsagt kjekt å støtta dei lokale butikkane, og sidan me fekk det ganske travelt, var det flott å få møblane raskt levert. Trass i travelheita og forseinkingar av utstyr til kjøkenet, er me svært nøgde med resultatet, fortel hotellsjef Elin Stene.

– Det vart ein koseleg atmosfære i det nye lokalet. Gjestene skryt over både innreiinga og maten. Men det er ikkje til å leggja skjul på at det har vore hektisk. Me ventar framleis på nødvendige maskinar og utstyr, skyt kokken inn.

Det nye lokalet har stolar til 20 personar, og om ein ikkje får plass på salongbordet kan ein nyta morgonstunda i lounge-området.

– Då me ikkje kan ha alle til frukost samstundes, har me laga til eit lounge-område i frukostsalongen. Her kan gjestene drikka kaffi medan dei ventar på å få koma til bords. Lokalet vil og vera ope til kl. 18 kvar dag, med gratis kaffe for dei som ynskjer det.

– Vil det bli servering av fleire måltid?

– Foreløpig er det kun servering av frukost, men med Tommy på laget kan det mogleg bli ei utvikling av mat-tilbodet i framtida, smiler hotellsjefen lurt.

Frukost on-the-go

I gangen utanfor frukostsalongen står det eit kjøleskap fylt med freistande påsmurte bagettar og forfriskande drikkevarer. Dette konseptet tydar på at gjestene blir teken godt vare på.

– Om gjestene skal ut på tur, eller har det travelt kan dei forsyne seg med påsmurte bagettar, salat, juice og iskaffi. Prisliste heng på kjøleskapet, og betaling tar ein over vipps. Om dette er av interesse vil det stadig bli fylt opp i kjøleskapet, smilar Persson.

Nøgd hotellgjest

Vidar Bridle Olsen (45) er ein av gjestene på hotellet. Haugesundaren jobbar opphavleg på Hydro Karmøy, men er utleigd til Hydro Husnes. Han har budd på hotellet i tre månadar, og vart svært glad då han fekk nytta seg av frukostsalongen denne søndagen.

– Eg har sakna ein stad å eta frukost, så dette var fantastisk. Det var eit godt og variert utvalg, med egg og bacon til og med. Treng ein meir enn det? ler den nøgde hotellgjesten og legg til:

– Og kaffi, det kan eg gå å forsyna meg med heile dagen. Eg er stornøgd. Det blir godt å koma tilbake til hotellet til eit slikt måltid etter nattskift på Hydro.