Bondeoppgjeret 2024: Nøgd, med atterhald
Årets landbruksoppgjer er unnagjort og partane vart til slutt einige. Det er omvikdelingen og nestleiar i Vestland Bondelag Kjersti Hjelmeland glad for.
– Eg må jo sei at det er bra me fekk ein avtale, sjølv om det aldri er slik at ein får alle ynskjer med. Dei gav mjølka eit løft, ikkje så mykje som ynskt, men det fekk i alle fall eit løft. Det trengst her i kommunen. I tillegg auka dei driftstilskotet litt, seier Hjelmeland.
Sjølv om Hjelmeland meiner at den nye avtalen på generell basis er god, er det likevel ting ho skulle ynskje blei teke med.
Annonse
Dårleg omdømme
– Det er dumt at dei ikkje gjorde noko med avkortinga, så du får framleis ikkje dekt sjukdomsavløysing. Dei har rett nok auka dagsatsen på sjukdom og permisjon, men for dei som jobbar utanom garden i tillegg så blir avløysartilskotet avkorta mot lønn, fortel nestleiaren.
– Det er veldig mange som jobbar utanom garden, og dei blir straffa. Det er uheldig for heile landbruket, det er ingen som vil bruka av si eiga løn til å betala avløysar. Det kan bli spesielt tungt viss du har nyinvesteringar eller skal stifta familie, og eg tenkjer at det gjer noko med rekrutteringa. Yrket får eit dårleg omdømme, poengterer ho.
I fylgje Hjelmeland så er meiningane om den nye avtalen delte blant bøndene i kommunen.
Annonse
– No har eg ikkje snakka med så mange, men av dei eg har snakka med så synest nokre av dei at det er bra, medan andre synest det er for lite. Slik vil det nok alltid vera, ein får auke på nokre område, og ikkje fullt så mykje på andre, understrekar ho.
– Det er uansett positivt at me fekk til ein avtale, og regjeringa syner at det er velvilje om landbruket, avsluttar nestleiaren.
