Bømlo-baserte Zinus sikrar kontrakt
Zinus, med kvinnheringar i nøkkelposisjonar, har skrive kontrakt om levering av kabelhandteringssystem til ferjer som Damen Shipyards byggjer for BC Ferries, den største ferjeoperatøren i Canada.
Rubbestadneset-baserte Zinus vert leia av uskedelingen Endre Eidsvik, med Bjørn Sturle Hillestad som marknadssjef og Ove Røssland som styreleiar.
– Denne kontrakten representerer ein avgjerande milepåle for Zinus, og me utvidar stadig vår installerte base i Nord-Amerika, uttalar Ronny Olson, salsdirektør for lading hjå Zinus.
Artikkelen held fram under annonsen.
Det er ladetårn til ferjekai og mottakareiningar til ferje som skal leverast, nærare bestemt ZPP800 ladetårnsløysing, saman med mottakaren SWC200 (Swing Connect System). Utstyret skal brukast til fire nye ferjer som Damen Shipyards skal byggja. Dei nye ferjene skal køyra viktige ruter på vestkysten av Canada, og Zinus-systema vil betra effektiviteten og berekrafta til desse ferjerutene, står det å lesa i pressemeldinga frå Zinus.
Leveransane frå Rubbestadneset skal starta i andre kvartal neste år, og sluttførast året etter.
– Me ser fram til å samarbeida med Zinus og Damen Shipyards for å motta desse nye systema, og for å implementera ladeteknologien i våre operasjonar. Me forventar at dette utstyret vil bidra til å fremja måla våre om å levera reinare og meir miljøvenlege operasjonar på vestkysten i Canada, seier Ed Hooper, administrerande direktør for skipsbygging i BC Ferries.