Boblefotballkamp på open dag
Kvinnherad kommune inviterer til open dag i Kvinnherad Arena fredag 18. oktober kl 16-18. Arrangementet vert skipa til i samband med årets tv-aksjon.
«Det vert kjekke aktivitetar for liten og stor. Boblefotball, klatring, turning og badminton er noko av det du kan prøve ut», skriv Anja Thunold frå Frivilligsentralen i ei pressemelding.
Ettermiddagen skal avsluttast med ein boblefotballkamp mellom ordførar Vegard Bjørnevik og arenasjef Daidalos Dahle og deira lag. Før kampen kan ein laga «heia-plakatar» i ein eigen plakatverkstad, om ein vil vera supporter for Vegard eller Daidalos sine lag.
Annonse
I tillegg vert det sal av pølser, kaker, kaffi og brus. Bøsser er tilgjengelege i arenaen, og alle salsinntekter går til TV-aksjonen.
«Me håpar mange tek turen til Kvinnherad arena denne ettermiddagen», avsluttar Anja Thunold.
