Blomeeng og frøsanking

Aina Solberg melder om eit lærerikt foredrag, som lokallaget i Naturvernforbundet ville arrangera fordi dei er opptekne av naturmangfald.

– Naturen blir bygt ned rundt oss, på ulike måtar. Dersom me bidreg til eit meir variert planteliv, er det bra for insekt, fuglar, smådyr og større dyr, som igjen er bra for artsmangfaldet, seier ho.

Stadeigne frø

Mange har dei siste åra begynt å så frø frå ville blomar i hagane sine for å hjelpa artsmangfaldet tilbake igjen. Men ifølge Tenneberg bør ein ikkje få blomeeng-frø frå eit hagesenter. Desse frøblandingane kan koma frå utanlandske artar som ikkje eigentleg høyrer til her. Dei kan spreia seg, og fortrenga dei ville plantane som treng plassen.

Tenneberg kunne fortelja at Norsk Institutt for Bioøkonomi (NIBIO) produserer frøposar med frø henta frå spesifikke norske landsdeler og regionar. Slik kan ein få tak i artar som høyrer heime akkurat der ein bur.

– Faktisk kan lærarar få gratis opplæring hjå Naturvernforbundet dersom dei vil starta blomeeng-prosjekt på skulen eller i barnehagen, det er berre å ta kontakt, fortel Aina Solberg.

Biologen Jeanette Tenneberg snakka også varmt om den gamle slåttenga, og korleis ein kan ta vare på desse gamle engene så ville blomar kan få gode vekstvilkår. Dette er eit arbeid som ein kan få tilskot for å driva.

Naturglede

Etter ein times føredrag, vart deltakarane med biologen ut frå Folgefonnsenteret for å sjå korleis ho sanka frø. Dei trong ikkje å gå langt før Tenneberg huka seg ned for å sanka frø frå ein tørr kløver.

– Eg brukar kaffifilter til oppbevaring av frø, då held dei seg tørre og myglar ikkje, kunne ho fortelja.

Det var Aina Solberg frå Naturvernforbundet i Kvinnherad som tok kontakt med Tenneberg for å få føredraget til Rosendal. Solberg er frå Sunde, og fortel at lokallaget i Naturvernforbundet vart stifta for eit års tid sidan.

– Me har lyst til å fokusera på naturglede. Me har mellom anna arrangert fuglekassebygging for born, og blome- og fuglesong-tur på Bjellandsneset. Me vil laga arrangement som ikkje berre handlar om trugslane mot naturen, men som gjer at me får augo opp for alt det fine rundt oss, seier ho.

Solberg syns biologen frå Bergen hadde mykje fascinerande og lærerikt å fortelja på laurdag.

– Det var spesielt kjekt å læra å sanka frø. Og så likte eg at ho føreslo å starta med å gjera berre litt av plenen om til blomeeng, ein treng jo ikkje ta heile plenen på ein gong. Det vert meir overkommeleg då, ler ho.