– Blir utagerande ved butikktjuveri

På måndag skreiv Grenda om butikken på Husnes som to dagar tidlegare meldte frå om to tilfelle av butikktjuveri utført av éin og same person på same dag.

– Det er ein etter kvart notorisk butikktjuv som driv og plagar butikkane på Husnes. Vi må no setja inn tiltak for å stansa denne mannen. Han har drive med dette over tid, og gjentekne gonger utført tjuveri og nasking, sa Torgeir Fosse ved Kvinnherad politistasjon den gong.

Etterpå har tjuveriforsøka halde fram. Onsdag vart han fysisk mot butikktilsette då han vart oppdaga, og politiet måtte rykka ut. Vedkomande vart då ilagt besøksforbod mot butikken. Dagen etter skjedde noko liknande, då i ein annan butikk.

– Mannen blir litt fysisk utagerande når tilsette i butikkane prøver å stoppa han. Sjølv om han får besøksforbod i ein butikk, så flyttar ein berre problemet til andre butikkar. Det er ei samansett problemstilling, og det er ikkje heilt enkelt å finna ei løysing utifrå straffelov og anna regelverk. Vi skal setja oss saman med fleire aktørar i kommunen for å sjå kva som kan gjerast, opplyser politistasjonssjef Sigurd Børve.