Bli med på Kajakk- og fottur i Nærøyfjorden

Kvinnherad Turlag arrangerer fellestur til Nærøyfjorden første helga i august.

4.-6. august kan ein vera med på ein flott oppleving i regi Kvinnherad Turlag.

«Bli med på kajakk- og fottur i Nærøyfjorden, midt i verdsarven! Det er ei oppleving å padla på Nærøyfjorden, ein smal fjord med stupbratte fjell og flotte fossar langs sidene», skriv Kvinnherad Turlag på sine sider.

Turen går fyrst til Gudvangen, kor ein møter resten av gjengen tidleg fredag ettermiddag for å padla over til Bakka. Der håpar turlaget å få til ei omvising i den vakre kvite kyrkja. Så er det etepause før ein padlar vidare. Om det er god tid går ein i land på Styvi, kjend frå programmet «Der ingen skulle tru at nokon kunne bu». I kveldinga kjem ein til Dyrdal, som er ei bygd med berre ein fastbuande. Det blir overnatting på den nedlagde skulen i Dyrdal. Så er det tid for middag, før kanskje ein liten rusletur opp i det gamle rekketunet.

Laurdag morgon blir det båtskyss til Bakka. Derifrå går turen over fjellet til Dyrdal, nærmare bestemt «Verdsarvturen», som er ein årleg fottur som går over to mil og 1300 høgdemeter. Etter turen vert det servert hjortegryte.

Sundag er det frukost og utvask, før ein legg ut på padleturen tilbake til Gudvangen. På vegen over fjorden kan ein kikka opp på dei fjella ein gjekk over dagen før.