Bli med på Ferieaktivitetar

Frå 24. – 28. juni kan du bli med på ei rekkje ulike aktivitetar spesielt retta mot barn og unge.

– Me har jo arrangert ein del slike Ferieaktivitetar no etter kvart, og det er alltid både kjekt og populært. Her legg me til rette for familiar, barn og undom, i grunn alle, slik at folk kan ha nokre aktivitetar å bli med på den fyrste veka, seier Anja Thunold.

Romma så mange

Thunold er også svært nøgd og takksam for fleire gode samarbeid med ulike lokale aktørar.

– Blant anna har me eit kjempegodt samarbeid med Frøystein Gard. Der har Kristine opna garden sin slik at folk kan få koma og helsa på alt frå kaniner og geiter til minigris og påfuglar. Bålpanne og høve for grilling er det også, fortel Thunold.

– Me har også fått til eit samarbeid med Øystein Skaala og Steinparkens vener. Det vil bli ein kjekk dag med ulike aktivitetar. Rosendal Putballpark har også blitt med og stiller med gratis inngang, slik at kven som helst kan koma og prøva putball, fortset ho.

Thunold er glad for å kunne skapa ein sosial møteplass som fell i smak og klarer å romma så mange.

– Dette pleier å vera populært, og det er ekstra kjekt at me når på tvers av så mange, anten det er nyinnflyttarar eller bestemor som ynskjer å finna på noko med barnebarnet. I tillegg har me med oss mange frivillige på dette, og me har fått mange gode tilbakemeldingar. Me ser at behovet er der og kjem utan tvil til å fortsetja med å ha ei slik veke, understrekar ho.

Thunold oppmodar også folk om å gå inn på Friskus for å sjå oversikta der, i tillegg å ta kontakt dersom det skulle vera noko.

– Eg vil også nemne at dagen Bua skal ha pop-oppdag med vassaktivitetar ved Opsangervatnet, så må føresette vera med ungane sine, avsluttar ho.

Program for veka:

24.06:

Aktivitetsdag på Valen ved Eskelandstranda og Valeparken.

Her blir aktivitetane vêravhengig, og Frivilligsentralen kjem tilbake med meir når det nærmar seg.

25.06:

Tur til Akvariet i Bergen.

Denne turen krev påmelding, og her er det allereie ventelister.

26.06:

BUA Pop-opp.

Her kan ein prøve alt Bua har å tilby til ulike vassaktivitetar, men ver obs på at barn må vera i fylgje med ein vaksen.

Gratis kino.

Husnes kino viser filmen Gullnebb. Arrangementet er ope for alle.

27.06:

Ope dag på Frøystein Gard.

Her kan ein kome og sjå på alle dyra, og det vil også vera mogeleg å ta med seg mat for grilling.

28.06:

Familiedag i Steinparken.

Det blir ulike aktivtetar i parken med ope Dinosaurshus, forfriskingar og kafésal av kaffi og kaker.

Ope Putballpark.

Putballparken er denne dagen ope for alle som ynskjer å prøva.