Bles liv i gammal tradisjon med Fraktefartøyet M/S Nyborg

– Før i tida selde dei jo juletre frå båt, det var heilt vanleg praksis på 50-, 60- og 70-talet, fortel Asgeir Andersen, kaptein på M/S Nyborg, før han held fram:

– Me har ikkje gjort noko liknande før, men ideen er å få brukt båten litt, og få til noko sosialt no etter koronaen. Eg har elles kontakt med ein frå Bjoa som sel flotte juletre av edelgran, og då tenkte eg det ville vera fint for oss å prøva noko slikt i år.

Turneen vil vare ei god veke. Den startar ved Valevåg ferjekai 10. desember, før fartøyet legg til kai i Rosendal, på Vikane i Ølve, ved Fiskerikaien på Halsnøy, i Mosterhamn, på Fitjar og til slutt endar opp i Dåfjorden. Det er der både M/S Nyborg og kaptein Andersen høyrer heime.

Andersen er maskinist og sjømann på sin lest, og har mellom anna vore jamleg på tur i Kvinnhersfjorden i sommar med M/S Sunnhordland.

Maritimt minnesmerke med rik historie

M/S Nyborg vart bygt i England i 1924, og har i dag status som verna skip av Riksantikvaren. Under 2. verdskrig vart båten nytta som minesveipar og bøyeleggjar av den engelske marinen, og vart også nytta som forsyningsskip under D-dagen i 1944.

Båten fekk norsk eigar i 1946. Det var då den vart døypt til «Nyborg», og vart ombygd til fiske- og fraktefartøy. Fram til 1997 gjekk Nyborg i fraktefart langs norske-kysten, spesielt i Rogaland og Hordaland. Dernest vart båten seld til Nordland, kor den etter ti år vart lagt i opplag.

I 2017 kjøpte Asgeir Andersen Nyborg. Båten er den einaste attverande store 50-tals sildesnurparen frå storleikstida til sildefisket, og den er også det siste fraktefartøyet av dei gamle ståldriftarane frå etterkrigstida.

M/S Nyborg er difor eit unikt maritimt minnesmerke for kysten vår, og Andersen ønskjer med juleturneen - i tillegg til det nemnde juletresalet – å gjera båten tilgjengeleg for alle som er interesserte.

Satsar på det lokale

Men førjulskosen stoppar ikkje med det.

– Det jo i tillegg kjekt å ha litt servering når folk kjem om bord, og me valt å fokusere på litt lokale ting, fortel Andersen vidare.

Foreininga for Fraktefartøyet M/S Nyborg har difor etablert eit samarbeid med den nyoppstarta tradisjonsverksemda Ole Vaagen Mineralvannfabrikk frå Stord. Julebrusen «Vaagavatn» skal seljast både som lesk frå byssa, og som produkt som publikum kan handle med seg heim.

Ole Vaagen Mineralvannfabrikk, ved Frode Hugo Aase, Rolf Andreas Naustdal og Odd Naustdal, har teke opp att ein lokal tradisjon som har lege i dvale i 70 år. Frå 1030- talet til 1950-talet vart «Vaagavatn» produsert i fleire smakar, og seld av Ole Bertin Vaagen.

Det er Fitjar-bryggeriet En liten øl (ELØ) som tappar brusen, og dette bryggeriet vil også vera representert i utvalet frå byssa på M/S Nyborg.

Dei som ønskjer å ta turen til ein av stoppestadane på juleturneen, får dimed moglegheit å kjøpe både mat og drikke, i tillegg til edelgran frå Bjoa. Foreninga bak M/S Nyborg helsar hjarteleg velkomen til ope fartøy, og lovar god julestemning til alle som tek turen.