Blåfalli Fjellhaugen: NVE seier ja – drøymer om byggjestart i 2025

SKL sitt store prosjekt «Blåfalli Fjellhaugen kraftverk» har vore gjennom litt av ein berg- og dalbane. Då Grenda skreiv om planane fyrste gong i 2014, var målet å setja det i bestilling to år seinare, slik at kraftverket kunne opnast i 2020. Kalkylen den gong var på 900 millionar kroner. Søknad om konsesjon vart sendt til NVE.

Men i mai 2016 kunne avisa fortelja at SKL utsette planane, rett og slett fordi kraftverket ikkje lenger var rekningssvarande. I oktober 2022 sa SKL-sjef John Martin Mjånes til Formannskapet i Kvinnherad at prosjektet var skrinlagt etter at regjeringa kom med nye skattereglar.

Klart større

Men allereie i fyrste halvdel av 2023 hadde vinden snudd, og SKL ville be NVE starta opp igjen konsesjonsprosessen. No er prosjektet plutseleg kome så langt at det kan nærma seg realisering. For den 16. desember sendte NVE brev til Energidepartementet.

«NVW tilrår at Sunnhordland kraftlag AS får konsesjon eter Vassressurslova til bygging og drift av Blåfalli Fjellhaugen kraftverk, og etter Vassdragsreguleringslova til å overføra og regulera avløpet frå Kvanngrødhorga og Verahaugen. NVE meiner fordelane med 70 GWh ny, fornybar kraftproduksjon er klart større enn dei samla ulempene for allmenne interesser», står det der.

NVE tilrår også at det vert gjeve anleggskonsesjon etter Energilova til nett-tilknyting av, og elektriske anlegg i Blåfalli Fjellhaugen kraftverk. Nett-tilknytinga består av ein cirka 1,5 kilometer lang jordkabel frå Blåfalli Fjellhaugen kraftverk til koplingsanlegg ved Blåfalli III.

– Det dette betyr er at NVE innstiller på at vi skal få konsesjon til prosjektet. Det er ei spesiell sak, for vi søkte eigentleg for mange år sidan. I staden for å laga ny søknad no, så kontakta vi departementet for å høyra kva vi skulle gjera. Då vart vi samde om at det haldt å oppdatera kunnskapsgrunnlaget, fortel adm. direktør John Martin Mjånes til Grenda.

Jobba for fullt

No skal konsesjonssøknaden opp til politisk handsaming i Energidepartementet, før endeleg avgjerd vert teke av Kongen i statsråd (regjeringa).

– Kor tid kan det skje?

– Veldig vanskeleg å vita. Vi håpar det er ei sak departementet kjenner godt, slik at det kan skje før sommaren, seier Mjånes.

– Kva vil de gjera no framover?

– Vi har ikkje vore i marknaden og henta inn tilbod frå alle leverandørane enno, så vi veit ikkje korleis prosjektet ser ut økonomisk. Men vi fekk jo ein veldig «boost» av svaret frå NVE, så framover vil vi jobba for fullt med å henta inn prisar og sjå kva det vil kosta. Før vi har dette på plass, blir det ikkje gjort noko endeleg investeringsvedtak. Det er ei veldig spennande tid å gå ut i marknaden på, opplyser John Martin Mjånes.

Milliardinvestering

Han vågar ikkje spå kor høg sluttsummen kan bli, men reknar med at totalen hamnar eit godt stykke over milliarden.

– Ja, det er ei milliardinvestering. Dette kraftverket er eit effektanlegg, som er ein del av strategien vår, og vi skal jobba hardt for å få det til, slår SKL-sjefen fast.

Viss alt går i boks, vonar han at fysisk oppstart ikkje er så langt unna.

– Draumen er at vi skal starta til neste år, men det avheng av at vi får konsesjon på denne sida av sommaren. Ved eit prosjekt i Etne fekk vi konsesjon i juni, og då byrja vi bygginga rett etter sommaren, filosoferer Mjånes.

Blåfalli Fjellhaugen kraftverk skal ha inntaket sitt i Midtbotnvatnet. Sjølve stasjonen vert bygd aust for Staffivatnet, medan det vert eit massedeponi i sørenden av Staffivatnet. Anlegget får ein installert effekt på 185 MW årleg. Produksjonen vert på 70 GWh årleg. Totalt, saman med Blåfalli Vik og Blåfalli III, går ein frå 1,6 TWh til 1,7 TWh i årleg produksjon.