BKS og LOS slår seg saman
BKS, med hovudkontor på Sunde, går saman med LOS Gruppen, med hovudkontor på Bømlo, og blir ein betydeleg regional aktør innan røyr, elektro og automasjon.
Publisert
Sist oppdatert
Det er eigarselskapet Eqva som meldte dette onsdag morgon. Børsnoterte Eqva og eigarane av LOS Gruppen har signert ein intensjonsavtale om å slå saman Eqva sitt dotterselskap BKS med LOS.
Avtalen skal omfatta LOS Gruppen sine heileigde dotterselskap LOS Elektro AS og LOS Eiendom Bergen AS, samt LOS Cable Solutions AS (51 %) og Zinus AS (53,3 %), der Endre Eidsvik frå Uskedalen er dagleg leiar.
Annonse
– Avtalen venta fullført innan utgangen av første kvartal 2024. Avtalen er blant anna på vilkår om tilfredsstillande selskapsgjennomgang, styregodkjenning og finansiering, skriv Eqva i meldinga.
Strategisk verdi
– Selskapa meiner at samanslåinga har stor strategisk verdi. Dette er eit viktig steg på vegen for å skape ein marknadsleiande og fullintegrert systemleverandør innan røyrsystem, elektro og automasjon, samt høgspent. Me styrker med dette vår solide posisjon som leverandør til den betydelege oppgraderinga og grøne omstillinga av norsk industri. Etter ei samanslåing vil Eqva som konsern ha i overkant av 730 høgt kvalifiserte medarbeidarar, skriv Erik Høyvik, dagleg leiar i Eqva i pressemeldinga.
I følgje intensjonsavtalen, vil Eqva formelt overta aksjar i LOS gruppen mot eit oppgjer i form av aksjar i Eqva sitt nyetablerte dotterselskap og ein kontantdel. Dotterselskapet vil samtidig overta eigarskapen av BKS. Eqva sin eigardel i det nye selskapet er venta å vera 61 %, mens eigarfamiliane i LOS gruppen vil eiga dei resterande 39 %. Eqva forventar at dotterselskapet vil bli notert på Oslo børs innan 12 til 18 månader.
