BKS Holding og Kvinnherad Elektro slår seg saman

Børsnoterte Eqva ASA og Kvinnherad Elektro AS har i dag signert ein intensjonsavtale om å slå saman Eqvas dotterselskap BKS Holding med Kvinnherad Elektro. Avtalen omfattar også Kvinnherad Elektro sitt 51 prosent eigarskap i Vassnesgruppen, skriv dei i ei pressemelding.

Potensial

Per fyrste kvartal 2023 rapporterte Eqva ei forventa omsetning for 2023 på mellom 650-750 millionar kroner og ei ordrebok på 461 millionar kroner. Samanslåinga vil medføre ei auka omsetjing for Eqva på mellom 125-175 millionar kroner på årleg basis, og auka ordrebok på 120-140 millionar kroner, kjem det fram av pressemeldinga.

– Me er svært tilfredse med å ha kome til einigheit med eigarane av Kvinnherad Elektro. Med denne avtalen demonstrerer me igjen at me leverer på Eqvas strategi for vekst. Samanslåinga inneber at me trer inn i nye marknader, kan utnytte synergiar ytterlegare på tvers av selskapa våre, samt få høve til å jobba tett saman med ein gjeng dyktige og erfarne medarbeidarar både i Ølen og Rosendal, seier dagleg leiar i Eqva Erik Høyvik i pressmeldinga.

Styrkja kompetansen

Etter transaksjonen vil Kvinnherad Elektro og selskapa i Vassnesgruppen fortsetje å operera under sine noverande namn og leiing.

– Me er svært nøgde med å bli ein del av Eqva-konsernet. Me har tidlegare samarbeidd tett med BKS, og me opererer i same region og marknad. Denne samanslåinga gjev oss alle høve til å auka vår marknadsandel og styrkje kompetansen og kvaliteten i våre tenester til både eksisterande og nye kundar. Me ser også potensiale for å ta på oss større kundeoppdrag som krev fleire fagdisiplinar i framtida, fortel dagleg leiar i Kvinnherad Elektro Kjetil Helvik i pressemeldinga.