BKS har signert sin største kontrakt nokosinne
BKS har teikna kontrakt om å stå for prefabrikasjon og installasjonsarbeid på Boliden sin sinkfabrikk. Det er tidenes største oppdrag for selskapet på Sunde.
Eqva sitt heileigde dotterselskap BKS har signert sin største kontrakt nokosinne. Det kjem fram i ei pressemelding måndag ettermiddag. Selskapet skal stå for prefabrikasjon og installasjonsarbeid på Boliden sin avanserte sinkfabrikk i Odda, i samband med ei utviding av anlegget. Sinkproduksjonen skal nesten doblast, samtidig som karbondioksidintensiteten ifølgje Boliden skal reduserast med 15 prosent frå ein allereie verdsleiande posisjon.
I tillegg skal prosessane moderniserast med auka satsing på digitalisering og automatisering.
Artikkelen held fram under annonsen.
«Vi utvidar no verdas mest klimaeffektive sinkverk. Éi historisk investering både for Boliden og for Norge», står det på Boliden si heimeside.
Meir klimavennleg
For Eqva og BKS føyer kontrakten seg inn i rekka av oppdrag som går ut på å gjera norsk kraftkrevjande industri og skipsfart meir klimavennleg. Ifølgje pressemeldinga har etterspurnaden etter slik ekspertise vore aukande, og ein reknar med at slike klima- og miljøprosjekt vil utgjera ein endå større del av verksemda i åra som kjem.
– Vi er svært stolte over den posisjonen og erfaringa som Eqva og BKS har opparbeida på dette feltet, ikkje minst som følgje av tidlegare kontraktar med framoverlente og krevjande kundar. Dette er den tredje store kontrakten for BKS med Boliden Odda. Vi gler oss over moglegheita til å fortsetja samarbeidet, seier Erik Høyvik, konsernsjef i Eqva ASA, i pressemeldinga.
For BKS, som har sitt hovudsete på Sunde, er kontrakten ei kjærkomen moglegheit til å jobba for og med lokalt næringsliv.
– Ein stor del av prefabrikasjonen vil skje ved vår verkstad på Sunde. Arbeidet som skal gjerast er berekna til om lag 60 årsverk, og skal utførast i løpet av dei komande 12-16 månadane, opplyser Tore Thorkildsen, salsleiar i BKS.
Meir enn i dobling
Kontrakten er ein rammekontrakt med verdi på cirka 160 millionar kroner for inntektsføring i 2023 og 1. halvår 2024, og inneber meir enn ei dobling av ordrereserven i Eqva sitt forretningsområde «Products, Solutions & Renewables».
Eqva ASA omtaler seg som ein kunnskapsbasert aktiv eigar av industrielle tenestebedrifter, og bidreg til den grøne omstillinga i maritim, kraftintensiv og fornybar industri. Sentrale selskap i Eqva er BKS Industri, Havyard Leirvik og Fossberg Kraft.