BKK: – Vil flytta for å styrka fagmiljøet
I torsdagens kommunestyremøte avslørte BKK/Eviny at dei planlegg å flytta frå Dimmelsvik til annan stad i Kvinnherad. Behovet for å styrka fagmiljøet vart trekt fram som eit viktig argument.
Publisert
Sist oppdatert
Kommunestyret fekk torsdag besøk av Kristin Aadland, konserndirektør nett/administrerande direktør i BKK AS, og Silje Skaar Sunde, leiar for forvaltning og utbygging i BKK AS. Etter å ha snakka litt om behovet for større nettkapasitet og utbygging av meir fornybar energi, handla mykje om avdelingane rundt om i fylket generelt og kontoret i Dimmelsvik spesielt.
– Brukar vi for mykje pengar på eigedomar, så har vi mindre å bruka på nettet. Vi har mange lokasjonar. Mange av dei er små og veldig dårlege. Lokalsjonane vi skal ha, må opp i kvalitet, sa Aadland.
Annonse
Ho stilte det retoriske spørsmålet om kva som er den framtidsretta løysinga for Dimmelsvik.
– Avdelinga der har ikkje den standarden vi skal ha. Der er mykje ledig plass, og det kan vera lite inspirerande å sitja på kontoret, for ein sit gjerne åleine, fortalde Aadland.
Fleire moment
Ho avslørte deretter at BKK/Eviny no vil gjera som Kvinnherad Breiband; å flytta frå Dimmelsvik. Fyrstnemnde har cirka 20 tilsette i Dimmelsvik i dag.
Annonse
– Vi har sagt til dei tilsette at vi skal sjå på ny lokasjon, opplyste Kristin Aadland.
Ho trekte fram fleire moment som tala for ei slik flytting; større fagmiljø for dei tilsette, tettare kontakt med andre bedrifter, lettare å rekruttera.
– Dette er ikkje ei nedlegging i Kvinnherad, understreka direktøren, og la til at ho og Sunde skulle rett til Dimmelsvik etterpå og snakka med dei tilsette.
– Vi ynskjer å samla dei som jobbar i Eviny og BKK, og finna ein felles heim for begge fagmiljøa, supplerte Silje Skaar Sunde.
Ordførar Vegard Bjørnevik (H) undra om det er nybygg konsernet vurderer, og kor langt dei har kome i kartlegginga.
– Om vi skal byggja nytt eller flytta inn i eksisterande lokale har vi ikkje sett på enno. Men vi har formulert våre krav til kontor og montørlager, opplyste Kristin Aadland.
Annonse
– Kjekt å høyra at de jobbar for å finna gode lokasjonar i Kvinnherad. Det var òg ein del av avtalen då de overtok Kvinnherad Energi, kommenterte Jostein Saghaug (MDG).
Grøn næringspark
Ove Lemicka (Frp) viste til arbeidet med å etablera grøn næringspark på Husnes.
– De er hjarteleg velkomne til å etablera dåke der, sa han.
Varaordførar Thea Vaage (Ap) hadde lese at BKK skal flytta kompetansearbeidsplassar frå Knarvik i Alver kommune til Bergen. Ho spurde om det same kan skje i Kvinnherad. Utsendingane frå BKK/Eviny svarte ikkje direkte, men hevda at lokasjonen i Knarvik framleis skal vera ganske stor. Silje Skaar Sunde påpeika at det dessutan berre er 20 minuttar å køyra frå Knarvik til Bergen, og at dei tilsette kan variera mellom kvar dei vil jobba frå.
– Å jobba nokre dagar i Bergen og verta del av eit større fagmiljø trur vi er utviklande for kvar einskild. Men vi skal ikkje leggja ned kompetansearbeidsplassar korkje i Knarvik eller Dimmelsvik, kommenterte Sunde.
