Bjarte Agdestein med nytt teikneseriealbum
Teikneserien Krüger & Krogh har no fått sitt fjerde album «Nord og ned». Handlinga føregår på Andøya. Teiknaren og Halsnøybuen Bjarte Agdestein meiner det berre er eit spørsmål om tid og økonomi før det kjem eit album frå Kvinnheradsområdet.
– Me hadde lansering på Andøya sist veke, og det må eg berre sei: Dei var utruleg imøtekomande på flystasjonen der oppe. Eg møtte til og med ein kar som var med i det Orion-flyet som dreiv ubåtjakta utanfor Husnes i 1983, eg trur kanskje han var sonar-operatør.
Ein prat med Bjarte Agdestein er full av spennande digresjonar og historier. Men så pensar me inn att på det som er temaet for intervjuet:
Annonse
– Hadde den ubåtjakta skjedd tjue år tidlegare, hadde det vore perfekt setting for eit Krüger & Krogh-album, seier han.
Ubåt-drama
I album-teikneserien Krüger & Krogh er handlinga nemleg lagt til midten av 1960-talet. Agdestein lagar serien saman med Endre Skandfer og Roland Kabícek. Hovudpersonane er agentane Jacob Krüger og Otto Krogh, som jobbar for «Avsnitt For Mellemliggende Anliggender» (AFMA) der dei løyser mysterie som fell utanfor ansvarsområda til Politiets Overvakingsteneste og E-tenesta. Teikneserien er kjent for å vera full av historisk riktige detaljar frå byrommet i Oslo, og i denne omgang, på Andøya.
– Serien kan plasserast i skjeringspunktet mellom fiksjon og fakta. Bakteppet er kanskje historiske hendingar, men handlinga er rein science fiction, fortel Halsnøybuen.
Annonse
I siste album får me avslutninga på historia i førre album som vart avslutta, bokstaveleg tala, med ein cliffhanger, på toppen av Mårtinden på Andøya. I oppfølgaren må agentane finna årsaka til nokon uforklarleg kraftige lydsignal i sjøen, som har blitt plukka opp med hydrofonar. Der me sist avslutta høgt oppe, får me no bli med agentane ned under sjøen i ein Kobben-ubåt for å løysa mysteriet.
– Me måtte ta ein tur til Marinemuseet i Horten for å ta eit enormt antal bilete av Kobben-ubåten dei har der. Me må vita korleis det ser ut inni ein sånn ubåt, og teikna det rett, elles vil alle som har hatt militærteneste i Kobben tenkja at me ikkje har peiling, fortel Agdestein.
Ungane elskar Halsnøy
I barneåra vaks Bjarte Agdestein opp på Landa på Halsnøy, før familien flytta til Heio, over Sæbøvik. Teikneserieskaparen fortel at det vart mykje drodling i mattebøkene. Sjølv om han ikkje starta med teikneseriar før i 12-års alderen, var iveren etter teikning svært stor.
– Eg hadde heldigvis nokon velvillige formingslærarar som let meg få lov til å teikna når eg ville.
I oppveksten let han seg inspirera av både MAD, Asterix og Sprint. Krüger & Krogh fell inn i ein tradisjon av franske og belgiske teikneseriar som var populære på 60-, 70- og 80-talet, der formatet ikkje var korte striper, men lengre historier i heile album. Teiknaren reiser framleis til Halsnøy minst ein gong i året, for å treffa familie og vener.
Annonse
– Me har det årlege «Landa-treffet» som fast sommarferie-tradisjon, der slekta møtest. Ungane elskar Halsnøy, så det er liksom hovudferien kvart år.
Lansering
Me spør sjølvsagt om det kjem ei historie med Krüger & Krogh i Kvinnherad ein gong, og då kjem svaret kjapt:
– Ja, det kjem! Det er eit sterkt ønske om det, men me er treige. Det er mykje spennande som har skjedd i området. Heile Sunnhordlandsbassenget ber jo om eit Krüger & Krogh-album!, utbryt han.
Enn så lenge er han nøgd med å ha gjeve ut det fjerde bandet i serien, som torsdag vart lansert på Tronsmo bokhandel i Oslo.
– Eg er skikkeleg nøgd med albumet. Me brukte mykje tid på research, og me fekk veldig mykje ut av det. Det vart bra!
