Bjarne (4) vann trøtraktor på open gard

Laurdag fann 650 store, små og nyfikne vegen til Open Gard i Revuro. Ikkje rekord for arrangementet, men meir enn nok til at bondelagsleiar Johannes Hjelmeland seier seg særs nøgd.

– Me veit at mange bønder er på sauesanking og rundballekøyring denne helga, men dei veit no korleis det ser ut på ein gard. Dette arrangementet er vel så mykje for dei som ikkje har eit fjøs å stikka innom når dei er nyfikne, seier Hjelmeland til Grenda midtvegs i arrangementet.

Trøtraktor

Sjølv hadde han delegert vekk det meste av oppgåver, og gjekk rundt med vesleguten Emil på armen og hjelpte til der det trongst.

– 4H og Omvikdalen Bygdekvinner står for maten, og Kjetil Mehl i Omvikdalen Bondelag –med fleire – tar seg av det andre, seier Hjelmeland.

Blant dei i «med fleire»-kategorien var Lene Monsen, som tok jobben som utropar når første runde av trekkinga skulle gjerast. Alle som kom til gards fekk eit lodd på veg inn, slik at bondelaget hadde kontroll på kor mange som vitja Open Gard i år. Blant dei mange sponsa gevinstane var tre John Deere-trøtraktorar, og fire år gamle Bjarne Haugen vann den første av dei.

Han kunne ikkje venta med å koma seg med å bli kjent med gevinsten, hoppa like godt oppå traktoren medan han framleis stod på podiet.

600.000 liter

Det var ikkje berre trekkinga som trekte folk til gards. Lausdriftsfjøsen mønstrar 70 årsdyr som produserer 600.000 liter mjølk i året, og mange tok turen gjennom fjøsen.

– Det er lenge sidan me har vore på open gard no, så det var kjekt å få stikka innom, smilte Lene Hjelmeland. Ho hadde med barna Karoline (9 månader) og Johannes (6) Tveito inn i fellesfjøsen til Revuro samdrift.

– Kyrne er større her enn dei me har heime, seier Lene Hjelmeland, som saman med barna bur på gard i Rosendal.

Johannes Hjelmeland smilte stort sett breitt mens han gjekk rundt og var vertskap, men vêrmeldinga for søndagen låg som ei regnsky på himmelen.

– Eg må i gang med rundballing av tredjeslåtten omtrent før den opne dagen er over, for i morgon skal det regna, seier han.

– Kor viktig er dette?

– Både for bondelaget, men også for Ola Nordmann er dette viktig. Me får vist fram at dyra har det fint og at me får vist korleis ting heng saman. Det krydrar me med både tradisjonsmat og maskinar, og viser med det fram eit bra spenn i det som er bondeyrket. Eg har sett folk frå alle kantar, heilt frå Vats. Vêret trefte me godt med, og då vart dette bra, sluttar ein nøgd Hjelmeland.