– Bevis på eit yrande kulturengasjement
Omstock fortel i ei pressemelding at dei har fått med seg debatten som har gått i det siste om manglande kultur- og utelivstilbod i kommunen, noko dei ynskjer å bidra med at skal bli betre.
Dei ynskjer å setja positiviteten i førarsetet og framsnakka eit allereie eksisterande tilbod.
– Det finst fleire fine utestadar, overnattingstilbod, shoppingmoglegheiter, kaféar og restaurantar. Me har også større og mindre festivalar, ein ny arena til både idrett og sosiale tilstellingar, russegrupper som set opp revyar, og velforeiningar og interesseorganisasjonar som ynskjer å bidra til auka sosial hygge, seier Trond Klas Betten i pressemeldinga.
Annonse
– Alt dette er bevis på eit yrande kulturengasjement over generasjonar, og me applauderer alle som stiller opp for bygda si, slik som oss. Me er glade i bygda vår, fortset Betten.
Etter nyttår
Omstock starta som ein idealistisk kulturaktør i 2016, der utgangspunktet var å setja opp årlege festivalar og arrangement som kunne løfta kulturbilete i Kvinnherad.
– Dette har resultert i at over 150 artistar, både norske og internasjonale namn, har besøkt kommunen. Og etter nyttår kan ein få med seg fleire konsertar, blant anna med Nazareth, Ole I’Dole og eit QUEEN tribute-band frå Ungarn, fortel Betten.
Annonse
Det vil også bli det Betten beskriv som eit storfint besøk av ein svært profilert TV-artist på vinteren, samt internasjonale DJ-ar som har spelt på både Glastonbury og andre store festivalar i Europa.
– Det kjem også til å bli mange lokale artistar, «bygdafest», karaoke, konkurransar med premiering og mange fleire overraskingar som kjem til å bli sloppe framover, uttaler Betten.
– Me håpar at de vil setja pris på tilbodet og at me kan få til mange fine opplevingar saman. Bak alt dette ligg det totalt godt over tusen dugnadstimar i året. Idealismen lever både på Husnes og i Kvinnherad, avsluttar han.
