«Bevar Øyatun»

#bevarØyatun

I høve ei mogleg endring i skulestrukturen i Kvinnherad kommune, tykkjer me det er på sin plass å stilla nokre spørsmål til dykk som skal ta dette valet på vegne av det mest dyrebare som me føresette har, nemleg borna våre!

Det er tre alternativ som er oppe til politisk handsaming. Me som vil bevara Øyatun ungdomsskule, ynskjer sjølvsagt at de som folkevalde skal gå for alternativ 0 i skulestruktur.

Ved førre kommuneval i 2019 gjekk Senterpartiet til val på at dei skulle behalda skulestrukturen slik den var på dåverande tidspunkt. Er det slik at du, Hans Inge Myrvold, som øvste leiar i Senterpartiet og ordførar i kommunen, tenkjer å bryte dette løftet?

- Som partiet tross alt gjekk til val på?

Dersom de vel å vrake dette valløftet, vil det verte vanskeleg å stola på valløfta i partiprogrammet til Senterpartiet ved neste kommuneval. Det vil vera vanskeleg for veljarane både å stola på at det som står i partiprogrammet er sant, og at de vil gjennomføra desse i den aktuelle perioden!

Barn og unges helse, fysisk og psykisk, er eit viktig moment å ta omsyn til.

I dag er det slik at ca. 70% av elevane kan anten gå eller sykle til og frå Øyatun. Ved å eliminere bornas moglegheit til å vera fysisk aktive til og frå skulen, vil de som politikarar vere med å støtte opp under fysisk inaktivitet. Fysisk inaktivitet vart i 2017 omtala som ein global pandemi av Folkehelseinstituttet (FHI). Og for å gje borna våre endå eit dytt i feil retning, vil de tilby dei ein skulekvardag der bruk av både gymsal og basseng vil vera vesentleg dårlegare enn det Øyatun kan gje dei.

Barnekonvensjonen gjev alle barn og unge under 18 år rett til å ha ein trygg og god oppvekst, uansett kven dei er og kor dei bur. Artikkel 3 seier handlingar som vedgår barn som vert sett i verk av styresmakter og organisasjonar, skal fyrst og fremst ta omsyn til kva som gagnar barnet best.

Noreg står midt i den største pandemien på lang tid. Reglar som avgjer kven dei kan omgåast, kvar dei skal vere, korleis dei skal omgå andre og kor mange dei kan vere saman med er faktorar som allereie gjev dei ein utrygg kvardag . Å leggje ned Øyatun ungdomsskule vil vera med på å tilføre endå eit moment som igjen vil føra til meir utryggheit blant borna våre.

At de som styresmakter i desse usikre tider skal ta avgjersle som ikkje gagnar bornas beste og gjev dei ein skulekvardag med dårlegare tilbod enn dei har nå, er eit brot på barnekonvensjonen artikkel 3.

Ein anna ting me undrar oss over er det faktum at elevtalet ved Øyatun i skuleåret 2021/2022 aukar med 15,4 % og i 2022/2023 aukar med 2,7% ikkje spelar meir inn når de som politikarar snakkar så fint om levande bygder i ein langstrakt kommune. Kva er vitsen med dette? Når de likevel vil sentrere og støtte oppunder såkalla «storskular» som fremjar døyande bygder og lite tilvekst!

Her er me så glad for at du, Hilde Enstad, så klårt og tydeleg gav beskjed om at Arbeiderpartiet har lært!

For det stemmer vel at du har lært?

I debatten på Husnes, september 2019, svara du nemleg dette på spørsmål i debatten, når tema skulestruktur og Øyatun kom opp:

- «Vi har lært! Høyrde du ikkje det? Vi har ikkje tenkt å gjera nokon ting med Øyatun. Vi har tenkt at no når tunnelen vert gratis, kjem det til å verta ei folkevandring bort der, så den skulen kjem til å bli stappfull» (02.09.2019 Grenda https://grenda.no/valdebatten-2019/).

Tenk at du kunne ha så rett! Ei auke i elevtalet på 15,4% tyder jo på dette.

- Så du held vel valløfte ditt du òg?

Me ynskjer svar på spørsmåla og problemstillingane som er nemnt ovanfor både frå Hans Inge Myrvold og Hilde Enstad. Dersom nokon andre av kommunestyrerepresentantane ynskjer å svare på nemnte spørsmål og problemstillingar så er de også hjarteleg velkomne til det. Svar kan sendast til: foreldregruppa2008@gmail.com

Av foreldregruppa på Øyatun.