Betalte halve konsernoverskotet i skatt
Sjølv om skattefuten tok meir av overskotet, tente Alsaker-konsernet særs godt i 2023.
Publisert
Sist oppdatert
– Alsaker-konsernet, som er konsernselskapet til Alsaker Fjordbruk, fekk eit driftsresultat på kroner 1.182. millionar i 2023. Med ein omsetnad på kr 3.004 millionar gir dette ein driftsmargin på 39,3 prosent, opplyser konsernsjef og -eigar Gerhard Alsaker i ei pressemelding i samband med at årsresultatet er godkjent.
Sjølv om konsernet har hovudsete på Onarheim på Tysnes, har det ein stor aktivitet i Kvinnherad, mellom anna gjennom eigarskapet til Fjelberg Fjordbruk og Tronds Marine Service.
Annonse
– Etter at norske myndigheiter innførte grunnrenteskatt frå 1. januar 2023 har skattekostnaden i konsernet auka kraftig, frå 21% i 2022 til 50% i 2023, skriv Alsaker vidare om dei økonomiske realitetane for konsernet.
Driftsmarginen i 2022 og 2023 var relativt like, rundt 40 prosent begge åra.
277 tilsette
Alsaker er eit vertikalintegrert oppdrettskonsern med produksjon av laks. Konsernet dreiv i 2023 fire smoltanlegg, 24 matfiskkonsesjonar, slakteri, reinsefiskanlegg og eit havbrukssenter. Konsernet har også eigen brønnbåt og ein stor flåte av servicebåtar, skriv Alsaker i pressemeldinga.
Annonse
Produksjonen i konsernet skjer i 14 kommunar; Alver (Meland), Bjørnafjorden (Fusa), Bømlo, Etne, Kvam, Kvinnherad, Sveio og Tysnes i Hordaland, samt Haugesund (Røvær), Stavanger (Rennesøy), Sandnes, Suldal, Tysvær og Vindafjord i Rogaland.
– I 2023 produserte konsernet 36.000 tonn laks, litt mindre enn året før. Slaktevolumet gjekk også ned samanlikna med året før. Ved utgangen av 2023 var det 277 tilsette i Alsaker-konsernet, opplyser Alsaker vidare.
