Besøksrekord på jubileumsutstilling
Då Galleri Guddal inviterte til jubileumsutstilling skjærtorsdag, vart det så mange besøkjande at mange måtte sjå seg nøydde til å venta utanfor under opningstalane. Uttrykket «sild i tønne» må seiast å vera godt dekkande.
- Ja, dette er rekord. Så mange har det vel aldri vore her på ei enkelt utstilling nokon gong, og det er sjølvsagt veldig kjekt, fortel ei strålande glad Gøril Guddal.
Det var tydeleg at dette var noko folk ynskte å få med seg. Ordførar Hilde Enstad var også til stades for å halda tale og offisielt opna den store utstillinga. 10 kunstnarar var blitt nøye utplukka og spesielt inviterte for å feira 30 år med drift.
Annonse
Førebilete
- Det er storslagent å få vera med her i dag, og eg vil takka deg Gøril for at du torde å satsa då du flytta opp her i Guddal i 2014, talar ordførar Hilde Enstad.
- Dette er ei som har hatt suksess og som har lukkast, og det å lukkast som gründer krev enormt mykje. Ho er utan tvil eit førebilete for oss alle, og har gjort alle bekymringar i forkant av 2014-sesongen og åra etterpå til rein skamme, skryt ho vidare.
Etter at ordføraren har erklært utstillinga for opna, nyttar Gøril Guddal høve til å få alle utstillarane som er til stades bokstaveleg tala fram i lyset. Ho takka alle som har stilt ut heilt frå den spede byrjinga i Rosendal, alle som har vore med år etter år og alle som har turt å satsa på dette galleriet.
Annonse
Opp- og nedturar
På spørsmål om korleis det er å feira 30 år med drift, svarer Guddal at 30 år utvilsamt høyrer veldig mykje ut.
- Det er jo fantastisk! Men også veldig rart, for det høyrest jo så mykje ut. Så har det også skjedd utruleg mykje på dei åra, det har vore mange oppturar og nedturar, fortel Guddal.
Vidare understrekar ho at 30 år er lenge for eit privat galleri å ha drift.
- Det har krevst ein enorm vilje for å få det til. Det handlar om å halda ut, og faktisk så har dei beste åra koma etter vanskelege periodar der me har måtta verkeleg tenka ut korleis me kan få det til å gå, fortel ho engasjert.
- Men i dag skal eg verkeleg berre kosa meg, avsluttar ho smilande frå øyra til øyra.
Annonse
Store og små
Det var langt i frå berre vaksne å sjå blant dei besøkjande, mange hadde teke med seg borna sine for å få oppleva både fin og spanande kunst denne solrike, men vindfulle, skjærtorsdagen.
Ljubica Simonovic og døtrene hadde teke turen samen med Ingunn Kroka Raudstein for å få med seg utstillinga.
- Det er veldig mykje fint her, men me likte spesielt godt nokre nydelege landskapsmåleri på veggen der borte, fortel dei då Grenda tek kontakt.
- Ja, det er kjekt her, og så er det mange fine måleri, legg Emilia på 9 år til.
