– Beskytt andre medan du beskyttar deg sjølv

Vitusapotek opna for årets vaksinering førre veke, og har hatt ein god del menneske innom allereie.

– Det er lett å få tatt vaksine her hos oss. Ein kan bestilla time på nettsidene våre eller berre koma innom på Drop-in time, seier apotekar Ingunn Kroka Raudstein.

Ein treng nemleg ikkje gå gjennom lege for å få vaksinen, då farmasøytane kan rekvirera den.

– Vi er sju vaksinatørar her på Husnes, så det skal godt gjerast å ikkje treffa på nokon av oss når ein kjem innom, smilar apotekteknikar Ann Kristin Fausk.

– Vi oppmodar om å ta vaksinen i oktober eller november, då det tar 10-14 dagar før ein har effekt av den. Influensa kjem ofte i to bølgjer, rundt juleferien og vinterferien, så det er greitt å vaksinera seg før det, skyt Raudstein inn.

Ho fortel også at verksemder kan tinga ein vaksinatør frå Vitusapotek og så kjem dei og vaksinerer.

Leger Utan Grenser

Ingunn og Ann Kristin oppmodar alle som er i risikogruppa til å ta vaksine, men også helsepersonell, dei som jobbar tett med andre eller rett og slett ikkje vil smitta andre.

– Det er så enkelt som at jo høgare vaksinedekning vi har, jo færre blir sjuke, seier Raudstein.

I år donerer Vitusapotek ei meslingvaksine til leger utan grenser for kvar influensavaksine som blir set. Dette er på landsbasis, og det er allereie snakk om fleire tusen vaksinar.

Meslingar er eit virus som finnest i fleire variantar, og det er særs smittsamt. Sjukdomen er den vanlegaste dødsårsaka blant barnesjukdomane som det finnes vaksine mot. I Noreg er sjukdomen så godt som utrydda, men i fleire andre land er den eit stort problem.

Norsk Medisinaldepot AS (NMD), som eig og driv Vitusapotek, har støtta Leger Utan Grenser sitt arbeid i felt sidan 2014 under visjonen «saman på veg for betre helse». Dei bidrar med midlar slik at Leger Utan Grenser kan utføra sitt viktige arbeid, heiter det på Vitusapotek sine sider.