Berre blide fjes å sjå!
I samband med den store ryddedagen 15. september, drog elevar og lærarar frå KVV i samla tropp til Bogsnes for å saumfara strandområda for bos.
På veg mot Bogsnes gjennom Husnes sentrum køyrde me forbi den eine gruppa etter den andre med gule refleksvestar på og bossekkar i hendene. Også barnehagar og barne- og ungdomsskulen var ute på tokt denne dagen. Like ved Husnes kyrkje trefte me på første gjengen frå Kvinnherad vidaregåande skule. Dei kom nett opp frå stranda med ein nokså slunken bossekk.
– Det har vore overraskande lite å finna, sa Leah Mo, ein av elevane som rydda i denne strandsona.
Annonse
Men to bildekk hadde dei funne, og drog sporenstreks eit hjul opp av sekken for å visa. Dei fire ungdommane såg elles ut til å trivast godt med strandryddinga.
– Ja, det har vore kjekt, og så er det jo viktig. Men det var litt vanskeleg å plukka enkelte stader, grunna flo sjø, sa Henriette Gjerde.
Langs vegen mot Bogsnes gjekk fleire grupper med elevar som hadde vore på bossanking. Etter ryddeøktene skulle elevar og lærarar samlast på Bogsnes kai, som var knutepunkt for strandryddinga i heile Husnesområdet. Herifrå skulle alt boset plukkast opp av Skjærgårdsservice, for så å fraktast til Rosendal for sortering.
Liv og røre på kaien
Annonse
Det vart etterkvart ein livleg gjeng som fylte kaien. Populær var også båten til Fiskeridirektoratet som låg ankra til kai. Her var også to reporterar frå TV2 med, for å dekka det som skjedde langs kysten.
– Kan me få koma om bord? spurde ein gjeng håpefulle elevar.
Olav Lekve, tidlegare kommunikasjonsdirektør i Fiskeridirektoratet, som òg var med i båten, måtte diverre seia nei.
– De er nok litt for mange!
Lekve fortalde elles at Fiskeridirektoratet hadde vore på synfaring på Huglo same dagen, for å undersøkja nokre blåskjel- og kamskjelanlegg dei hadde fått varsel om.
– Det låg eit kamskjelanlegg på sjøbotnen som me må fjerna. Blåskjelanlegget skulle ha vore fjerna for lenge sidan, men hadde berre blitt flytta på land. Blir slikt liggande, vert det til mikro- og makroplast, og gjer stor skade i naturen, sa han.
Annonse
Haugen med bossekkar vaks på kaien, og elevane samla seg ved desse. Ein stor gjeng skulle gjerast greie for før dei kunne sendast heim.
– Elevane har vore kjempeflinke, eg er veldig nøgd med innsatsen deira, sa Anne Husevåg, leiar av miljøkomiteen ved Kvinnherad vidaregåande, som hadde arrangert ryddedagen ved skulen. Det var rundt 250 elevar som hadde vore med.
Før dagen vart avslutta, ljoma ein siste beskjed ut frå roperten:
- TV2 vil intervjua dykk! Kom fram og ta ein prat med dei før de går heim!
