Berre 52% brukar refleks

Haustmørket kombinert med framtidige vêrmeldingar fører til at sikta for trafikantane blir markant dårlegare.

Bilførar og forgjengarar er godt vane med lange lyse dagar, og er kanskje ikkje førebudd på at kveldane brått blir mørkare. I dette høvet har Grenda snakka med Regionleiar Vestland i Trygg Trafikk Knut Olav Røssland Nestås og Jorun Elin Kvistad Gjuvsland ved Husnes Trafikkskule.

Trygg Trafikk kan fortelja at kvar årstid har sine ting ein må vera ekstra oppmerksam på, til dømes om våren må ein vera oppmerksam på syklistar og motorsyklar. Om hausten er utfordringane knytt til dårleg sikt.

Ein kan lesa på heimesida til Trygg Trafikk, at dess tidlegare ein blir sett dess betre. Utan refleks er ein synleg på 25-30 meters hold, medan ein med refleks synes på 140 meters hold når bilen bruker nærlys. Omrekna til sekund har bilføraren 10 i staden for 2 sekundar til å reagera.

Refleksteljing frå 2022 for Trygg Trafikk viser at det berre er 52% i Vestland som bruker refleks.

– Når ein spør folk om kvifor dei ikkje brukar refleks, svarar dei fleste at det er fordi dei har gløymd den. Det er altså ikkje det at dei har noko imot å bruka refleksen, seier Knut Olav Røssland i Trygg Trafikk, og legg til;

– Mange kjem på at dei har gløymt refleks, men snur ikkje for å henta ein. Eit godt tips kan vera å plassera refleks i jakkelommene slik at den alltid er med.

Han fortel vidare at barn er ofte veldig flinke å bruka refleks, og dei kan hjelpa vaksne å bli betre på å hugsa det.

Jorun ved Husnes Trafikkskule kan minna om at refleks er ferskvare og at dei kan bli utsliten. Det kan då vera at gammal refleks kan gi falsk tryggleik.

Ho viser til video som vert brukt i mørkekøyringskurs, der det er fokus på kva bilføraren kan gjera for å unngå ulykker.

•Det kan vera lurt av bilførar å sjekka synet sitt regelmessig, då synet endra seg med alderen.

•Sjekk at bilen er i stand. Då med ekstra fokus på lys, at dei verkar og lyktene er reine, samt vindaugsviskarar.

•Avpassa fart etter forholda, og bruka lysa riktig.

Vestland fylke ligg på 52% når det kjem til refleksbruk, det er litt over landsgjennomsnittet på 48%. Trygg Trafikk jobbar mot at landsgjennomsnittet skal opp til 53% i 2026.

– Det er viktig at det er eit samarbeid mellom mjuke og harde trafikantar, seier Røssland Nestås.

Fotgjengaren bør gjera seg synleg i trafikken, og bilførar må vera bevist på at sikta er dårlegare på denne årstida.