Bergen Group Skarveland konkurs

I går vedtok styret i Bergen Group Skarveland AS å slå seg konkurs som følgje av manglande ordreinngang og sviktande resultat. 70 tilsette mistar då jobben på Sunde.

Dette kom fram i ei pressemelding frå selskapet onsdag morgon. Då Grenda var utom på Sunde var det framleis litt aktivitet i hallen og i kontorbygget, men for dei tilsette var det for tidleg å svara på spørsmål frå pressa.

 

Vanskeleg

offshoremarknad

Verksemda til Bergen Group Skarveland AS har vore knytt til røyrinstallasjonar i samband med å byggja nye skip, og dei har levert til offshore og landbasert industri.

– Både skips- og offshoremarknaden har det siste året blitt råka av nedskjeringar, noko som har vore sterkt negativt for selskapet, heiter det i pressemeldinga frå Bergen Group ASA, morselskapet til Bergen Group Skarveland.

 

70 mistar jobben

I pressemeldinga står det at dei ikkje-reviderte tala for første halvår i år viser at selskapet har hatt ein omsetnad på 32 millionar norske kroner, og hatt eit negativt driftsresultat på 9 millionar kroner. Hovudkontoret til Bergen Group Skarveland AS ligg på industriområdet ved gamle Sunde ferjekai.

31. august i år hadde dei 70 fast tilsette, og det er dei som no mistar jobben når tingretten slår selskapet konkurs. Klubbleiar Johnny Aarsrud fortel at 45 av dei tilsette bur i Kvinnherad.

 

– Trist

– Dette er trist for alle. Selskap er selskap, men det er dei tilsette og familiane deira som har lån i banken. Men dette er som det er. No har alle dei tilsette fått beskjed, og så blir det møte med bustyrar, seier Aarsrud.

Han legg til at det er fleire som har vore i same situasjonen dei siste åra, på grunn av tøffe tider i oljebransjen.

– Då Søral sløkkte eine hallen vart det mindre oppdrag på land, og då søkte vi offshore-arbeid. Dette blir jo litt synsing, men viss Søral hadde opna hallen igjen, eller sett i gong med produksjon av delane dei treng for å gjera det, så hadde vi vore i full gong her endå, trur klubbleiaren som sjølvsagt håpar at fleire av dei som mistar jobben klarar å finna seg anna arbeid i næraste framtid.