Berekraft i fokus

Det var berekraft som var dagens tema. Det var såleis svært inspirerande å høyre presentasjonen til Kristine Moldenhauer Biseth om korleis dei lokale gründerane overtok drifta av fabrikken frå det internasjonale konsernet Palfinger i 2021, og snudde ein nedleggingstrua arbeidsplass til suksess.

Biseth er ein av medeigarane i Herde Kompositt, og jobbar i dag som utviklingssjef i utviklingsgruppa der. Fabrikken er 50 år i år, og dei som jobbar der har 25 års ansiennitet i snitt. I dei 6000 kvm store fabrikklokala produserer dei mellom anna verdas største livbåtar, og snart er det innovative «egget» klart til montering. Det ligg dessutan an til at verksemda vil få enno fleire bein å stå på framover, men kva dét inneber, held verksemda enno tett til brystet.

I stadig vekst

Då dei måtte sei opp 40 tilsette i 2020, var tanken: Kva gjer vi? Svaret var å mobilisere. Draumen er å koma attende til gulltidene, og dit er dei på veg.

– No er vi «on schedule», og vi har klart å hente inn att dei som kan hentast inn. I dag er vi 60 fast tilsette, samt tre innleigde. Situasjonen er slik at vi må bemanne opp dersom vi får landa dei kontraktane vi jobbar med i dag, forklarte Biseth, og la til at det er mykje spanande på gong i Ølve om dagen.

Ho haldt fram med å understreke at stadig nye kundegrupper får auga opp for moglegheitene i kompositt, og i Ølve får dei mange førespurnader om kva materialet kan nyttast til. Ein av grunnane til at verksemda stadig når ut til nye kundegrupper vart forklart med sosiale medier.

– Der er det Facebook og LinkedIn som gjeld, slo Biseth fast.

Dei femten utanforståande som deltok på møtet fekk ei omvising på fabrikken då presentasjonen om Herde Kompositt var i boks, før Marianne Groth frå Eika haldt eit innlegg om Berekraft. Møtet vart avslutta med ein workshop, der spørsmålet var «korleis kan di bedrift ta fatt i dei krava som kjem innan berekraft?».

Kvinnherad er eit potensielt nedslagsfelt

Marita Gjerde er kompetanseutviklar i Næringshagen i Hardanger. Ho kunne i forkant av møtet fortelja om at dei no har to medlemmar i Kvinnherad. I tillegg til Herde Kompositt, har også Rolf Hunstad, ved RHU AS, nyleg teikna ein avtale med næringshagen.

– Kvinnherad er eit potensielt nedslagsfelt for agendaen vår, og vi ser no på moglegheita for å jobba tettare opp mot verksemder der, kunne ho fortelja.

Difor meinte ho det var kjekt å kunne leggje medlemsmøtet til Kvinnherad denne gongen. Sigmund Vereide, dagleg leiar i næringshagen, kunne vidare fortelja at Herde Kompositt er grunnen til at dei vart kjend med Kvinnherad, og no ser på eit vidare samarbeid med næringslivet her.

– Kvinnherad har eit spanande næringsliv og mange spanande bedrifter, men per i dag er vi i ein tidleg sonderingsfase for eit vidare samarbeid. Skal vi satse meir i Kvinnherad er det viktig at det blir koordinert gjennom næringslosen og næringssjefen, og vi er nøydd å finne fram til nokre praktiske løysingar som fungerer. Nærleik til verksemdene er viktig når ein skal drive oppfølging, slår Vereide fast.

Næringshagen i Hardanger er ein bedriftsrådgjevar med hovudkontor i Øystese, som jobbar for lokal og regional næringsutvikling. Dei har i dag 17 medlemsbedrifter og over 60 målbedrifter. Den sistnemnde kategorien får ikkje berre rådgjeving, men også opp til 75% avslag på tenestene næringshagen tilbyr. Dette på grunn av at det er SIVA som er operatør for næringshageverksemda, og målbedriftene, som til dømes Herde Kompositt, kan dermed nyte godt av medlemsskapet.