Ber Statsforvaltaren om kai-uttale

I slutten av juni sende Multiconsult søknad til Kvinnheradkommune om rammeløyve for oppføring av ny snøggbåtkai på Ranavik, på vegner av tiltakshavar Vestland fylkeskommune.

Før ferjedrifta vart elektrifisert, la snøggbåten til kai like ved bilferjene, men då ladetårnet skulle på plass, måtte snøggbåten vika. Det vart difor laga ein mellombels kai til snøggbåten 50 meter aust for ferjelemmen. I søknaden om rammeløyve er den nye, permanente kaien plassert litt nærare ferjekai og venterommet, enn den mellombelse er.

I søknaden skriv Multiconsult at det er avgrensa med plasseringsmogelegheiter for det nye kaianlegget i området som er regulert til kai, grunna den allereie etablerte trafikkmessige infrastrukturen med ferjekai, busshaldeplass og trafo.

– Ikkje klart større fordeler enn ulemper

Det er søkt om dispensasjon frå byggegrensa mot sjø og rammeløyve for riving av

eksisterande og oppføring av nytt kaianlegg for snøggbåt. Kvinnherad kommune ber no Statsforvaltaren om uttale i samband med dispensasjonssøknad for bygginga.

Dei viser til eit generelt forbod mot å byggja i strandsona, og peikar på at eventuelle avvik frå dette forbodet skal som hovudregel skje gjennom ordinær planlegging, ikkje som dispensasjon.

– Administrasjonen vurderer at tiltaket snøggbåt kai med si plassering som krev dispensasjon ikkje vesentleg set til sides dei omsyna som er knytt til bevaring av natur- og kulturmiljø og landskap på staden då området allereie er utbygd med ferjekai, oppstillingsplass for bilar og ein mellombels snøggbåtkai, skriv administrasjonen i Kvinnherad kommune i brevet til Statsforvaltaren.

– Samfunnsnytta med ein ny snøggbåtkai nærare plassert til venteskur, universelt utforma og som ei permanent løysing er fordelar. Manglande heilheitleg løysing for mjuke trafikantar og uavklara parkeringsløysing er klare ulemper, vurderer administrasjonen.

Dei viser til at det pågåande planarbeidet vil utgreia og skal gje ei regulering for heile området.

– Førebels vurdering er at fordelane med å gje dispensasjon i denne saka ikkje er klart større enn ulempene, og at det kan vera uheldig å gje dispensasjon som kan låsa bruken av området til løysing som ikkje har vurdert alle trafikkale tilhøve godt nok, skriv administrasjonen i si vurdering, og ber om Statsforvaltaren si uttale til saka.