Ber om at kommunen sender etterspurde opplysningar i tilsynssak snarast
Statsforvaltaren i Vestland oppretta tidlegare i vår ei tilsynssak med bekymring for om pasientane ved sjukeheimane i Kvinnherad kommune får forsvarleg omsorg og behandling. Tilleggsopplysningane dei har etterpurt i saka er enno ikkje meldt inn.
Publisert
Sist oppdatert
Saka vart oppretta etter eit oppslag i Kvinnheringen 23.02.21, kor Statsforvaltaren i Vestland, ved assisterande fylkeslege og seksjonsleiar Linda Svori, følgjeleg ba om tilleggsopplysningar. Desse opplysningane vart ønska snarast, og skulle seinast vera innmeldt 18. juni.
20. juli var desse enno ikkje meldt inn, og Kvinnherad kommune har no fått purring på dei etterspurde opplysningane, med ny meldefrist seinast 9. august.
Annonse
Ønskjer innsyn i vurderingane som er blitt gjort
Opplysningane som er etterspurd er mellom anna kopi av risikovurderinga kommunen utførte før gjennomføringa av omstillingstiltak og endringar i bemanning og drift ved helse og omsorgstenestene, spesielt ved Halsnøytunet og heimetenesta.
Vidare ønskjer dei opplysningar som fortel om kva vurderingar leiinga har gjort av kompetanse- og bemanningssituasjonen ved Halsnøytunet, samt kopiar av rutineendringane som er bestemt, kopi av bemanningsplan ved Halsnøytunet før og etter 1. januar 2021 og oversikt over talet plassar og pleietyngde ved dei ulike avdelingane på Halsnøytunet.
Saka vert handsama som ei tilssynssak med heimel i helsetilsynslova § 4. Denne seier mellom anna at Statsforvaltaren si oppgåve i slike tilsynssaker er å gi råd, rettleiing og opplysningar som medverkar til at befolkninga sine behov for helse- og omsorgstenester vert dekka.
