Ber Kvinnherad om å busetja 40 flyktningar neste år - ei innstramming frå i fjor
Det er Integrerings- og Mangfoldsdirektoratet (IMDi) si oppgåve å busetja flyktningar som treng vern frå krig og forfølging kvart år. Dette må dei ha med seg kommunane på, men i år har dei teke høgde for ein strammare kommuneøkonomi mange stader.
Det er godt over to og eit halvt år sidan Russland gjekk til ein fullskala invasjon i Ukraina. Mange ukrainarar har vorte drivne ut av heimlandet sitt, og mellom 70 og 80 000 av dei har hamna i Noreg, frå 2022 til no.
– Det har blitt gjort ein ekstraordinær innsats over heile landet for å busetja flyktningar dei siste åra. Me er avhengige av at kommunane stiller opp også neste år. Talet på flyktningar som vert busett i kommunane må likevel vera berekraftig over tid. Difor har regjeringa sett i verk fleire innstrammingstiltak, og talet på flyktningar neste år går ned, seier arbeids- og inkluderingsminister Tonje Brenna.
Annonse
Press på kommunale tenester
I fjor ba IMDi Kvinnherad om å ta imot 85 flyktningar. Kommunestyret vedtok å ta imot 50. No oppfordrar IMDi til å ta imot 40 flyktningar i 2025.
– Me må erkjenna at den rekordhøge busetjinga har medført ulik grad av press på kommunale tenester som bustad, helse, skule og barnehage, seier direktør i IMDi Libe Rieber-Mohn.
Kvar haust sender Integrerings- og mangfoldsdirektoratet (IMDi) brev til kommunane om å busetja eit visst tal flyktningar neste år. Talet for kvar kommune vert bestemt ut frå innspel frå KS og fylkeskommunane. Kommunane få så eit tilskot frå staten som skal dekka utgifter til busetjing og integrering.
Annonse
Det er kommunestyret som skal handsama oppfordringa frå IMDi og bestemma kor mange flyktningar Kvinnherad kan ta imot i 2025.
