Ber folk førebu seg betre til teoriprøven: – Altfor dårleg
Vestlendingane kjem noko høgare ut enn landssnittet.
I ei pressemelding frå Statens Vegvesen oppfordrar dei alle som skal ta teoriprøven til å førebu seg betre. På landsbasis i fjor blei det nemleg levert inn meir enn 90.000 teoriprøvar med strykkarakter. Beståttprosenten for klasse B var på 57 prosent for teoriprøven og 78 prosent for oppkøyring.
Berre 60 prosent
Annonse
Sensorar frå Statens Vegvesen gjennomførte totalt 17.094 oppkøyringar i Vestland i fjor. 81 prosent av kandidatane bestod oppkøyringa. Samstundes var det 23.450 personar som gjennomførte teoriprøven i fylket, men av desse var det berre 60 prosent som klarte det.
På Stord kan ein sjå at 1.822 personar tok oppkøyring. Av desse var 1.318 for personbil (klasse B). 2.555 tok teoriprøven. I Odda var det 589 som tok oppkøyring (403 for personbil), og 609 kandidatar som tok teoriprøven.
Statens Vegvesen har ikkje publisert tal for dei ulike trafikkstasjonane i 2024, men går ein tilbake til 2023 kan ein sjå at 40 prosent ved Odda trafikkstasjon og 46 prosent ved Stord trafikkstasjon ikkje bestod teoriprøven det året.
Sløsing
Annonse
Statens Vegvesen er ikkje imponert over 2024-resultatet.
– Dette er altfor dårleg, og det fører til ei enorm sløsing med både våre og kandidatane si tid og pengar, uttalar avdelingsdirektør Heidi-Kristin Herbst i ei pressemelding.
Rekordmange gjennomførte teoriprøven i 2024.
– Men det hjelp lite når 43 prosent av prøvane får stryk. Vi skulle gjerne sett at denne andelen var mykje lågare. Eg vil derfor oppmoda alle som skal ta teorien til å stilla veldig godt førebudde, legg ho til.
På landsbasis var andelen stryk på teoriprøven den same i 2024 som året før.
57 prosent av dei som tok oppkøyring på personbil i Vestland valte dessutan å ta dette med automatgir.
