Benedicte er ny fastlege i Rosendal

– Eg var ferdig med turnusteneste på Haukeland i Bergen på torsdag, fortel Benedicte Sjo Tislevold til Grenda.

Tobarnsmora frå Sunde var ferdig utdanna i 2018, men i staden for å ta turnustenesta og bli lege på direkten, gjekk ho laus på ei doktorgrad etterpå .

– Eg forska på akutt blodkreft, som er ei aggressiv form for blodkreft med dårlege prognosar for den som blir råka. Sidan dei har så dårlege prognosar, så jobba eg i doktorgradsarbeidet med å finna tidlegare svar på korleis pasientane responderte på cellegifta, forklarer Tislevold.

Breidde i fagfeltet

Ho bevegar seg litt i frå doktorgraden sin med å bli fastlege.

– Eg valte forskarlinja då eg byrja på andre året av studiet, og spesialisering inn mot blodsjukdommar var retninga eg gjekk. Allmennmedisin er både meir familievenleg og breiare. Som allmennlege hjelper ein mange fleire. Eg tykkjer det er kjekt å halda på breidda i fagfeltet, seier 31-åringen.

Torsdag var ho ferdig med turnustenesta, måndag startar ho i jobben på helsestasjonen i Rosendal. Helga går til flytting.

– Me ynskjer oss heim til Kvinnherad. Sambuaren min slektar til Omvikdalen, så me flyttar dit, seier Sunde-jenta som allereie har fått barna i barnehagen i bygda.

Ho går også inn i legevaktturnusen i Kvinnherad, og held på å ta blålyslappen slik at ho kan køyra på utrykking.

Stillinga som fastlege i Rosendal fekk ho i fjor sommar, og ho har dermed visst lenge at hektisk byliv og jobbkvardag på eit gigantisk sjukehus skal bytast ut.

– Me gler oss til ein rolegare haust og til koma oss på plass, smiler dokter Tislevold.