Bekymringsfull utvikling i ulukker for motorsykkel
Om sommaren er kvart tredje dødsoffer i trafikken ein motorsyklist. No vil Samferdsledepartementet vurdera nye tiltak innan alderskrav, utstyr og føraropplæring for MC.
I ei pressemelding frå Samferdsledepartementet vert det spesielt uttrykt uro for utviklinga i ulukker med lett motorsyklar, der det er mange unge førarar.
Annonse
«Denne sesongen har så langt fire førarar og éin passasjer omkome på lett MC, det vil seia nær 25 prosent av omkomne totalt på MC. Talet på hardt skadde og skadde er også svært høgt for motorsykkel generelt og for lett motorsykkel spesielt», står det i pressemeldinga.
Det er mange som har jobba for å gjera det tryggare å køyra motorsykkel i Noreg, men ein ser altså at det ikkje fører til noko reduksjon i ulukkene.
– Risikoen for å bli drept eller hardt skadd er meir enn 50 ganger høgare på lett MC enn for ein bilførar. No må me forsterka og intensivera dette tryggingsarbeidet ytterlegare, seier samferdsleminister Jon-Ivar Nygård.
Han har hatt møte med Statens vegvesen, Utrykningspolitiet, Statens havarikommisjon og fagpersonar med kompetanse på tryggleik for MC-førarar. Saman har dei vurdert tiltak som kan vera effektive på kort sikt.
Annonse
– Det hastar å få på plass konkrete tiltak som kan gjera det tryggare å vera motorsyklist, seier samferdsleminister Jon-Ivar Nygård.
Pressemeldinga gjev ikkje informasjon om nøyaktig kva tiltak som vil bli sett inn, men det vert nemnt at dei vil sjå nærare på alderskrav, sikkerheitsutstyr og føraropplæring.
