Behandla ti sosialklagesaker frå Kvinnherad i 2021

Dette melder Statsforvaltaren i Vestland i ei oppsummering av klagesaker på vedtak etter sosialtenestelova frå 2021.

Her listar dei også opp dei ti NAV-kontora i fylket med flest klagesaker. Kvinnheradkontoret kjem inn som nummer ni, med sine ti klagesaker.

Færre søkte om sosialhjelp

I 2020 fekk Statsforvaltaren i Vestland inn 344 sosialklagesaker til behandling, noko som viser at talet på klager gjekk ned med 15% i 2021. Den gjennomsnittlege saksbehandlingstida per klagesak var på 0,7 månad i 2021, eit snitt som har halde seg stabilt frå 2020.

Sjølv om Statsforvaltaren i Vestland ikkje kan forklare kvifor det har vore færre klager til behandling, viser dei til to hovudårsaker som dei meiner kan ha påverka dette talet:

Mellom anna var det færre som søkte om sosialhjelp i 2021, noko som naturleg medfører færre klagar. Vidare gav Nav-kontora fleire medhald.

– Alle klagar skal først behandlast av det Nav-kontoret som gjorde vedtaket, og dersom Nav sjølv gjev klagar medhald skal ikkje klageinstansen behandle klagen. I alle tilfelle er det ganske få som klagar på sosialhjelpsvedtaka frå Nav, berre 2 prosent av dei om lag 14 000 som får sosialhjelp i Vestland, informerer dei.

I 2021 vart 89% av dei vedtaka som var klaga på stadfesta, slik at klagar ikkje fekk medhald. Statsforvaltaren gav klagar medhald i 1% av klagesakene, slik at Nav-kontoret sitt vedtak vart omgjort. I 10% av klagesakene fann dei feil ved Nav-kontoret sitt vedtak, slik at vedtaket vart oppheva og saka sendt tilbake til Nav for ny behandling.