Begge ferjene ute av drift - Rute 1 startar 0900

Driftsproblem har råka Årsnes - Varaldsøy - Gjermundshamn hardt siste halve døgeret. Frå 0945 er begge i drift.

– Grunna driftsproblem blir sambandet innstilt inntil vidare, meldte Fjord1 klokka 0341 natt til onsdag.

Tysdag kveld hadde rute 2, som trafikkerer sambandet aleine mellom kl. 2030 og 0605, problem, og vart først varsla mogeleg innstilt frå 2200-avgangen frå Gjermundshamn, noko som vart stadfesta i ny melding i det den nemnde avgangen skulle gått.

Så fekk Fjord1 MF «Lærdal», som er fartøyet som vanlegvis trafikkerer rute 2, i sving nok til å ta seg av 2315-avgangen, men også denne ferja måtte kapitulera på natta.

Som om ikkje det var rikeleg, så blei MF «Sildafjord» hindra i å gå til Årsnes kai, fordi «Lærdal» blei liggjande ved ferjekaien grunna sine driftsproblem. Først då «Lærdal» kom seg av garde, fekk «Sildafjord» ta opp sin aktivitet.

I si sjette melding på knappe 13 timar, rapporterte Fjord1 like før klokka åtte onsdag morgon at det skal vera normal drift for rute 1 frå avgangen 0900 frå Gjermundshamn. Når rute 2, den einaste som går innom Varaldsøy, er i drift at, er førebels uvisst.

Oppdatert frå Fjord1 kl. 0907: Ferje 2 (MF «Solskjel») startar opp frå Varaldsøy kl. 09.45.