– Begeret flaut over

Grunnane for dette er fleire, og Hesvik legg dei fram for Grenda.

– Ein av grunnane til at begeret flaut over var at Senterpartiet, ved finansdepartementet, tilsette Jens Stoltenberg som ny sentralbanksjef. Dette er toppen av det Senterpartiet burde ha halde seg for gode for, seier ho.

Medan nasjonale media kunngjorde at det var to aktuelle kandidatar til denne stillinga, trekkjer Hesvik fram at det i ettertid er kome fram at det var fleire som hadde fagleg kunnskap, men som ikkje vart innkalla til intervju. Dette stiller ho seg svært kritisk til, og kritikken rettar ho mot finansdepartementet, Trygve Slagsvold Vedum, med fleire.

Fly forbanna

– Energipolitikken er òg ein viktig faktor som viser at Senterpartiet ikkje held fast ved det dei lova ved valet. Utanlands-kablane fører berre til fordyrande kraft og med Paris-avtalen, det grøne miljøet, vil vi nok få merka dyr straum lenge, seier Hesvik.

Ho peikar vidare på at Senterpartiet lova at landet skulle ut av EØS-avtalen i valkampen. Derimot gjekk partiet heller med på eit prosjekt med havvindmøller, med innføring til land. Hesvik forklarar korleis det vart førespegla at dette prosjektet skulle gje billigare straum under pressekonferansen, men at det har vist seg at havvindproduksjon ikkje svarar seg, då det er for høge kostnadar i per kilowattime.

– Det som er uakseptabelt er at dei utfører vasskrafta i mengder, det som har gjeve oss billeg straum til industri og forbruk her i landet. Politikken med å gje straumstøtte til folk i korte periodar er jamgodt med almisser. Vi treng reinare politisk styring her. Å reise land og strand rundt med lovnadar om at dei vil snu denne politikken, for dernest å gå inn i eit slikt plott, gjer meg fly forbanna! forklarar Hesvik engasjert.

Ynskja ei sentrumsstyrt regjering

Engasjementet til Bergljot Bruåsdal Hesvik er ikkje nytt i bygde- og særleg næringspolitikken, noko hennar rolle i Kvinnherad Bonde- og Småbrukarlag er med på å understreka. Ho har også vore medlem av Senterpartiet tidlegare, og før stortingsvalet meldte ho seg inn i partiet på ny. Ynsket var ei sentrumsstyrt regjering for landet, med samarbeid både til venstre og høgre.

Ein av fadesane senterpartiet gjorde, meiner Hesvik, var å la partipolitikken styra, i staden for å setja sakene i perspektiv.

– Dei hengte seg opp i populismen, og gløymde kva dei stod for. Dei øydela for seg sjølve når dei nekta å samarbeida med SV. I valkampen slo dei fast at dei ville vera eit sentrumsparti. Hadde dei halde på den filosofien, ville det gått betre, meiner ho.

Kameraderi og andre unotar

Samstundes ser Hesvik nokre tendensar som ho ikkje akkurat snakkar varmt om. Mellom anna er ho ikkje imponert over korleis regjeringstoppane presenterer seg og driv med kameraderi. Ho ser samarbeidet mellom Ap og Sp som daudfødt, då Ap er ein lettversjon av Høgre, og dei er heilt usamde om EØS.

Det beste for framtida meiner Hesvik er å få Norge ut av EØS-avtalen, at landet får ei regjering som styrer ressursane til landet i eige herredøme, og såleis evnar å dra ut overskotet i handelsbalansen.

Bergljot har meldt frå til Senterpartiet, lokalt og sentralt, at dei må fylgja prinsipprogrammet sterkare, skal ho melde seg inn att.

– Og merk dykk at det nye Arbeidarpartiet blir Raudt. Ap frå Gro sine dagar har utvikla seg til dagens Ap. Den beste tida for Arbeidarpartiet var då Odvar Nordli var statsminister. Då hadde vi jamn fordeling i samfunnet, og partia samarbeidde, seier ho, før ho avsluttar med å sitere Nordli:

– Eit langt liv har lært meg at marknadskreftene enno ikkje har løyst eitt sosialt problem, ikkje eitt einaste. Men du verda kor mange dei har skapt.

Ingen uro i Kvinnherad Senterparti

Gunnar Våge, gruppeleiar i Senterpartiet i Kvinnherad, såg på Facebook at Bergljot Bruåsdal Hesvik hadde meldt seg ut av partiet.

– Det er hennar val, seier han til Grenda.

Observasjonen gjorde Våge like etter at Jens Stoltenberg vart tilsett som ny sentrabanksjef, og han har forståing for at det er utfordrande å sitja i regjering i desse dagar. Hadde han ikkje sett Facebook-statusen til Bergljot, ville han ikkje vore klar over at dei nyleg har mista eit medlem.

Han peikar vidare på at det er lettare å sitja i opposisjon på Stortinget, og særleg når det har vore så uroleg som det har vore den siste tida.

– Det er klart det er belastande å sitja i regjering slik det er no, med tilsetjinga av sentralbanksjefen, dei høge straumprisane og med utanlandskablane. Men her lokalt kjenner eg ikkje til noko uro, og eg reknar med eg ville høyrt noko dersom det var noko turbulens her lokalt, slår han fast.