– Baroniet er eit flaggskip

Sektorleiar Anbjørn Høivik seier at det ikkje er med lett hjarta dei føreslår å redusera tilskotet til Baroniet, men understrekar at politikarane må gjera sine eigne prioriteringar.

– Baroniet Rosendal er eit flaggskip for Kvinnherad både som reiselivsdestinasjon og kulturkommune. Det er såleis ikkje med lett hjarta kommunedirektøren føreslår å redusera tilskotet frå kommunen, fortel Høivik.

Sektorleiaren understrekar at bakgrunnen for forslaget er at Kvinnherad kommune er i ein svært krevjande økonomisk situasjon.

– Det er ei kjensgjerning at tilskotsordningar er noko av det første som vert vurdert når ein kommune må spara pengar. I budsjettforslaget ligg mange smertefulle grep. Til liks med Baroniet må mange lag, organisasjonar og kulturarrangørar bu seg på mindre tilskot dersom forslaget vert vedteke, men ein freistar å retta dette inn slik at drift av lokalt lagsliv vert minst mogleg råka, og slik at dei med sterkast rygg må tole den største børa, utdjupar Anbjørn Høivik.

 

Ikkje gjennom avisa

No er det opp til politikarane å avgjera om og korleis kutta eventuelt skal gjennomførast.

– Vi gler oss over at Baroniet Rosendal dei seinare åra har fått ein monaleg auke i tilskota; mykje av dette etter politiske initiativ. Kommunedirektøren har difor lagt vekt på at forslaget om redusert tilskot skal vera godt synleg i økonomiplandokumentet som formannskap og kommunestyre skal behandla, slik at det skal vera enkelt for politikarane å gjera sine eigne prioriteringar, forklarer Høvik.

Om Grenda sitt intervju med fylkesdirektør Per Morten Ekerhovd, kommenterer Anbjørn Høivik:

– Når det gjeld dialogen med fylkeskommunen om dette og anna, vil den takast direkte med dei og ikkje gjennom avisa.