Barnetalet i Kvinnherad stuper

For barn fødde frå 2002 til 2011 tel kvar årgang i snitt over 170 barn/ungdommar. I tiårsperioden etterpå (2012-2021) tel snittårganen under 130 elevar. Underlagsmaterialet til Kvinnherad kommune si innbyggjaroversikt viser barnekulla er monaleg mindre over heile kommunen. Talet på innbyggjarar frå 1 til 10 år er 25 prosent mindre enn talet på innbyggjarar mellom 11-20 år.

Jamt på Halsnøy

Grenda har summert tala frå Kvinnherad kommune fordelt på bygder og alder. I denne samanhengen har me samla dei ti årgangane frå 2012 til 2021 i éin delsum, og årgangane frå 2002 til 2011 ein annan.

Halsnøy er området der skilnaden mellom 1-10 og 11-20 år er minst. Tofte krins (Sæbøvik) har faktisk fleire i yngste bolken enn eldste. Der ligg også mykje av forklaringa på kvifor Øyatun er den ungdomskrinsen i Kvinnherad som har jamnast fordeling mellom tiårsbolkane.

Nordsida halvert

Det er fleire av Kvinnherad-bygdene som opplever drastisk nedgang i talet barn, men ingen har så omfattande nedgang som Ølve. Av innbyggjarane frå 1 til 20 år er berre 11 av 57 – under 20 prosent – i den yngste halvdelen.

Av dei 160 innbyggjarane som soknar til Nordsida ungdomsskulekrins, er 107 i den eldste tiårsbolken og 53 frå yngste.

For Husnes ungdomsskulekrins sine totalt 1481 innbyggjarar mellom 1 og 20 år, er prosentfordelinga 57-43 i favør eldste gruppa. Undarheim skulekrins har den skeivaste prosentfordelinga, med 60-40 i favør eldste gruppa. Valen skulekrins er omtrent jamn mellom gruppene, mykje på grunn av eit rekordkull på 22 barn fødde i 2021.

Rosendal ungdomsskulekrins er den nest største i Kvinnherad, og mønstrar ei aldersfordeling som er ganske lik Husnes ungdomsskulekrins. 892 innbyggjarar mellom 1 og 20 år er fordelt på 58-42 på eldste tiåret.

Seimsfoss veks

Bygda med størst del under ti år er faktisk Seimsfoss. Trass i at bygda har mista 23 innbyggjarar frå 2018 til 2022, er det blant dei under 20 år overvekt av yngste halvdel, med 34 av 63 totalt i den kategorien.

Ser ein på barn i grunnskulealder, utgjer dei i dag 1589 elevar frå 1. til 10. trinn. Om seks år ligg det talet an til å vera 300 færre elevar, nærare bestemt 1291 etter dette talgrunnlaget.