Barnehagesaka: Frikjent i tingretten
Staten vart frikjent i tingretten. Det kan påverka søksmålet mot Kvinnherad kommune.
Publisert
Som Grenda har skrive tidlegare, har fleire private barnehagekonsern saksøkt staten og over 100 kommunar, deriblant Kvinnherad. Søksmålet går ut på at dei private barnehagane meiner kommunane sine tilskotsvedtak for åra 2020-2022 er i strid med barnehagelova sin regel om at dei private barnehagane skal likebehandlast med dei kommunale. Dei har difor reist erstatningskrav mot kommunane.
Barnehagane krev også at forskrifta om tildeling til dei private barnehagane blir kjent ugyldig. Akkurat dette spørsmålet er avgjerande for heile saka.
Annonse
I kommunestyret førre veke opplyste kommunedirektør Leif Ove Mikkelsen at Oslo tingrett har behandla søksmålet mot staten. I sommar kom dommen, der retten frikjente staten og slo fast at forskrifta er gyldig.
– Dommen frå tingretten er i utgangspunktet positiv for kommunane. Men søksmålet mot kommunane var uansett stansa i påvente av denne dommen, sa Mikkelsen, og la til at ankefristen går ut i desse dagar.
