Banken donerer kunstsamling til kommunen

I løpet 150 år med bankdrift samla Kvinnherad Sparebank seg opp ei monaleg kunstsamling. Ho er no overrekt til Kvinnherad kommune.

Tysdag kom banksjef Ivar Gundersen til ordførarkontoret med avtalen som sikrar at kunstsamlinga til Kvinnherad Sparebank blir verande i Kvinnherad også i framtida.

– Eg har pynta kontoret for høvet, opna ordførar Hans Inge Myrvold i forkant av signeringsseansen, og slo handa opp mot det store landskapsbiletet han hadde fått opp på veggen tidlegare på dagen.

 

120 verk

Til bords med ordføraren sat Gundersen, som gjorde greie for bakgrunnen for gåva.

– Historia byrja då me flytta ut av banklokalet i Rosendal, noko dei siste tilsette gjorde for eit års tid sidan. Gjennom åra har banken fått mange bilete og kjøpt mange bilete, inkludert av lokale kunstnarar. Me kom til eit punkt der me måtte diskutera kva me skulle gjera med kunsten, som tel 94 ulike kunstverk, fortalte Gundersen.

Det er kunsten som er registrert og taksert.

– I tillegg er det ein del mindre kunstverk, som ikkje er registrerte. Kanskje me snakkar om 110-120 kunstverk, la han til.

Gundersen ville ikkje spesifisera kva verdi samlinga har, men fortalte at det var gjort ei taksering for nokre år sidan.

– Men det er snakk om ganske mange hundre tusen kroner, sa han rundt, og la til at det er veldig gøy at det er mange lokale kunstnarar.

– Eit poeng for oss lokalt var at det ikkje skulle sendast til banken sentral i Stavanger og hamna på eit lager der. Så me tok eit initiativ til å gjera noko lokalt, og hatt nokre rundar med fleire. Kom fram til at det beste var å overlata det til Kvinnherad kommune, utan nokon plikter knytt til bileta, forklarte banksjefen.

Det er ei rein gåve som kommunen disponerer slik dei sjølve syns er best. Samlinga er sett saman av bilete, skulpturar og okle.

– Kjekt viss dei blir hengt opp på ein måte der dei gir glede og nytte, kanskje på institusjonar og offentlege bygg.

 

Ut til folket

Ordførar Hans Inge Myrvold ser på kunsten som ein del av historia om kva Kvinnherad Sparebank var for kommunen.

– At dei kjem til oss med det er gledeleg. Nett no er kunsten trygt bevart i kjellaren i rådhuset, men det skal fram i det offentlege, det er den fremste prioriteten. Det er ei skikkeleg flott julegåve, og eg vil få takka SR Bank for gåva, rosa han.

– Me får vera med på å halda liv i den identiteten som Kvinnherad Sparebank gjennom generasjonar bygde opp. Kunsten vil vera eit symbol på det, og me skal syta for at det når ut til folket, lova Myrvold.

Banksjefen håpte på si side at dei mange som har eit forhold til banken, gler seg over at denne kunsten blir synleg igjen for mange.

Maleriet som Hans Inge Myrvold hadde valt å hengja på veggen på ordførarkontoret er eit storslage naturbilete, opphavleg ei gåve frå samarbeidande bankar i høve 75-årsjubileet til banken i 2003.

– For første gong har eg følt meg liten i rådhuset, smilte han og skotta opp.

«Norsk Landskap» av Odd Dubland står det på plaketten.

– Nasjonalromantisk og høvande, meinte ordføraren.

Kulepenn og stempel kom fram, og eit namnetrekk seinare disponerte kommunen kunst frå Karl Erik Harr, Vebjørn Sand og Sigrid Øyrehagen.

– Godt me har fått nye kodelåsar på rådhuset, slutta Myrvold.