Bankane går saman om Vipps

Over 100 norske bankar kjem inn på eigarsida i Vipps saman med DNB. Blant dei er Sparebank1-alliansen, som med det gjev opp mCash.

– Gjennom dette samarbeidet står vi betre rusta til å vinna kappløpet i konkurranse med nordiske og internasjonale aktørar, skriv Rune Bjerke, konsernsjef i DNB og påtroppande styreleiar i Vipps i ei pressemelding.

Initiativtakarane representerer til saman 106 norske bankar. Og saman skal dei vidareutvikla Vipps som heile Norge si mobile lommebok. Noko som betyr slutten på Sparebank 1 si løysing, mCash. Dei overfører satsinga si til Vipps, og inviterer alle sine brukarar med over.

– Vi opplever ein marknad der stadig fleire aktørar kjempar om å lansera eigne løysingar for mobil betaling. For mange er dette forvirrande, anten ein skal betala eller ta i mot betaling. Sjølv om vi gjennom vår satsing på mCash har teke ein solid posisjon på kort tid, har mange kundar gitt uttrykk for at dei vil føretrekkja éi løysing. Difor går norske bankar no saman om å laga éi felles mobil lommebok for alle norske bankkundar, seier Finn Haugan, konsernsjef i Sparebank 1 SMN på vegne av heile Sparebank 1-alliansen.

Med det står dei sterkare i kampen mot internasjonale og store aktørar som Apple Pay, PayPal og MobilePay.

DNB vil framleis stå som den største eigaren, med sine 52 prosent av aksjane. Sparebank 1-alliansen skal eiga 25 prosent, dei sjølvstendige sparebankane 12 prosent, Eika Alliansen 10 prosent og Sparebanken Møre 1 prosent, står det å lesa i pressemeldinga.

Det betyr at alle bankane som er heimehøyrande i Kvinnherad no vil vera under Vipps-paraplyen.