BAKOM inviterer til Game Jam for unge vestlendingar
Og lokkar med flotte premiar til dei som blir med i denne sommarens spel- og filmkonkurranse.
Publisert
Filmveksthuset BAKOM, som er støtta av Vestland fylkeskommune og Bergen kommune, arrangerer i juli ein open Game Jam og konkurranse i spel-, animasjon-, dokumentar- og fiksjonsfilm for alle vestlendingar mellom 16 og 30 år.
BAKOM er eit kreativt produksjonsverkstad for deg som vil laga film og spel. På BAKOM kan du utforska ulike fagfelt og sjangrar, og øva deg god på det du trivest best med.
Annonse
– BAKOM held til sentralt i Bergen. Me har diverse produksjonsutstyr for utlån og arbeidsstasjonar med relevant programvare, samt tilgang på møterom, filmverkstad, klipperom, datalab og visningsrom. Fasilitetane er tilgjengeleg for medlemmane etter avtale med avdelingsleiar, skriv BAKOM på si nettside.
«Avstand»
Konkurransen er open for alle mellom 16 og 30 år, og temaet for konkurransen er «avstand».
– Ein eigen fag-jury for kvar kategori plukkar ut maks fem bidrag som vart nominert, og deretter vert ein vinnar kåra. Vinnarane blir offentleggjort på eige prisutdelingsshow på Bergen Kino etter sommaren. Alle deltakarane vert invitert til prisutdelinga, og vil motta ein mindre premie for innsatsen. Dei nominerte filmane og spela vert vist på prisutdelinga, står det på nettsida.
Annonse
Sofie Vestad i BAKOM fortel til Grenda at moglegheitene i konkurransen er omtrent uendelege. Ho kjem med følgjande tips til deltakarane:
– Å laga ein stop-motion-film er kanskje det aller enklaste å gjera heilt åleine. Alt som trengs er ein smartphone og gratisappen Stop-motion Studio, og så er det berre å byrja å flytta på ting føre kamera. Eller ein kort naturdokumentar filma med mobilen.
Tema og rammer vart lansert 1. juli, og leveringsfrist for bidraga er 31. juli. Filmane vert vurdert av BIFF UNG for eventuelt å bli plukka ut til visningar i regi av BIFF.
