Bad om oppdatering: – Vi må få tala for Kvinnheradpakken

– I Kvinnherad kommune har vi mange pågåande samferdsleprosjekt. Dette er kostbare prosjekt, der vi som kommune nyttar stor delar av våre frie midlar, innleia Johansen.

Han understreka at politikarane treng eit best mogleg kunnskapsgrunnlag ved vurdering av dei ulike prosjekta, men sakna ei finansiell oversikt som tek føre seg rekneskapsførte utgifter, budsjetterte kostnadar, framtidige kalkylar og eventuelt kostnadsoverskridingar/gjenståande midlar for dei einskilde prosjekta.

Johansen bad om ei statusoppdatering på Kvinnheradpakken (delt opp i dei ulike delprosjekta i pakken), Fjelbergsambandet, ferjekai Varaldsøy, infrastruktur grøn næringspark, forprosjekt trafikksikring Løfallstrand, forprosjekt Furebergtunnelen, og forprosjekt ferjeinnkorting Kvinnherad-Stord.

Vil ta det opp

Når det gjeld Kvinnheradpakken opplyste vikarierande kommunedirektør Gunn Berit Sandnes Fosse at det er Vestland Fylkeskommune som er ansvarleg utbyggjar og såleis må svara om utgiftene.

– Men dette kan kommunen ta opp i neste møte i kontaktutvalet for Kvinnheradpakken den 17. juni, lova ho.

For Fjelbergsambandet er det planlagt ei politisk sak til kommunestyret 20. juni. Denne vil omhandla dekking av påløpte kostnader til planarbeidet, i tillegg til prognose på framtidige kostnader. Også infrastrukturen i den grøne næringsparken kjem til handsaming 20. juni.

For ny ferjekai på Varaldsøy har kommunen laga forprosjekt, og har utfordra fylket på å utarbeida reguleringsplan fram til lokasjon for nytt ferjestø i Glevika (Skjelnesodden).

– Eventuelt mobilt ferjestø vart diskutert i møte med fylket i februar, og det er planlagd nytt møte no i juni, sa Gunn Berit Sandnes Fosse.

Møte i februar

Status for forprosjektet trafikksikring Løfallstrand – Furebergtunnelen er at kommunen i møte med fylket i februar, signaliserte at ein ROS-analyse for tunnelen heilt klart må utarbeidast av fylket.

Til slutt fortalde kommunedirektøren at forprosjektet for ferjeinnkorting Kvinnherad-Stord er i prosess. Kommunane Stord og Kvinnherad har sett av ein halv million kroner kvar, medan fylket har bidrege med 200.000 kroner.

– Vi må få tala for Kvinnheradpakken. Det er viktig, slik at vi politikarar får vita korleis det går. Eg er difor veldig glad for at de vil ta det opp med fylket den 17. juni, takka Johansen.

Ville rykte

Ove Lemicka (Frp) supplerte at det går «ville rykte» om kvifor Krokatunellen ikkje er opna.

– Alt frå at røyra er lagt feil og at asfalten må gravast opp att, til at tverrsnittet er feil og at tunellen ikkje er godkjent, sa han.

Han også kravde meir informasjon.

– Det har blitt orientert om at prosjekta i Kvinnheradpakken er blitt dyrare enn forventa, og at prosjekt seinare i porteføljen difor ikkje har turvande finansiering. Det har derimot på trass av fleire oppmodingar ikkje gitt fullnøyande informasjon om kvifor prosjekta har blitt dyrare, påpeika han.