Avviste klage på gebyr

Frp stod mot resten av partia i forvaltningsutvalet då Sunde Prosjektutvikling AS sin klage på ein gebyrfaktura var tema.

I samband med bygging av ein tomannsbustad i Stølshaugvegen på Husnes, sendte Kvinnherad kommune faktura til utbyggjar Sunde Prosjektutvikling AS. Fakturaen gjaldt eit tilleggsgebyr på 5.783 kroner, dette grunna manglande dokumentasjon i søknaden.

Sunde Prosjektutvikling ved Ove Lemicka sendte inn klage, mellom anna fordi har meiner kommunen «gjennomgåande toppar byggesakskrav med tilleggsgebyr». Han viste til at i denne saka ar det ordinære gebyret på heile 93.000 kroner. «Vi ber om at tilleggsgebyret vert fråfalle, fordi det er urimeleg. Saka er ei enkel sak der sakshandsamaren ikkje har hatt noko tyngjande ekstraarbeid, sjølv om han har måtta senda ein mail og bad om tilleggsinformasjon», skreiv Lemicka.

I forvaltningsutvalet hevda Kai Morten Torget (Frp) at fleire entreprenørar oppleverer det på same måte.

– Det er vanskeleg å forhalda seg til dei faktiske kostnadane. Viss ei bedrift ikkje kan dokumentera alle timane dei har brukt, så går dei konkurs, men det er annleis i det offentlege. Eg synest vi må ha ein prinsipiell diskusjon om korleis vi fakturerer. Mange klarar rett og slett ikkje å forstå kvifor ting tek så lang tid og kostar så mykje, sa han.

 

Meir byråkrati

Øyvind Hardeland (Ap) var svært usamd, og frykta at registrering av timeforbruk vil føra til meir byråkrati.

– Vi kan ikkje dokumentera oss ihel. Eg lit på at administrasjonen har gjort ei rett vurdering. Kommunen må etter kvart få betalt for dette, enten dei heiter Per eller Pål, sa han.

– Viss du leverer inn bilen på verkstad og får ei rekning på 5.000 kroner med melding om at det er ekstraarbeid, hadde du akseptert det?, kontra Torget.

Leiar Clara Hveem påpeika at forvaltningsutvalet nok er feil fora å ha diskusjonen i, då det ikkje er dei som bestemmer gebyra til kommunen. Dermed vart klagen avvist.